O Leche Río Breogán lidera a LEB Ouro de baloncesto logo de dúas xornadas e comanda un sexteto de equipos invictos que completan o Ourense, o Carramimbre Valladolid, o HLA Alacante, o ICG Força Lleida e o Levitec Huesca. O Breogán lidera a táboa tras gañar este sábado en casa ao Liberbank Oviedo por 72-54. O cadro asturiano encaixou a súa primeira derrota do curso.
Segundo colócase o Ourense, que sumou ante o Tau Castelló (82-65) a súa segunda vitoria, mentres que o Carramimbre asaltou a cancha do ZTE Real Canoe madrileño (81-93) con 25 tantos e 14 rebotes de Sergio de la Fuente e 20 puntos de Frank Bartley. Seydou Aboubacar contribuíu con outras 14 capturas.
Con 44 puntos de valoración Bamba Fall, que asinou 26 tantos e 12 rebotes, foi a figura da vitoria do tamén invicto HLA Alacante, esta vez a domicilio ante o Melilla (66-83).
O ICG Força Lleida superou o venres ao Afanion Almansa por un axustado 82-80 e ese mesmo día o Levitec Huesca venceu un só punto (71-70) ao Covirán Granada cunha última canastra de Grabauskas.
