O Cafés Candelas Breogán asfixiouse nos últimos cuartos dos dous partidos que perdeu diante dos seus afeccionados esta tempada e só logrou derrotar nese parcial ao Movistar Estudantes nas nove xornadas que se disputaron na liga Endesa.
O último exemplo foi o partido deste domingo co Tecnyconta Zaragoza, ao que avantaxaba en nove puntos cando empezaron os dez minutos finais do partido, nos que se lle escapou o triunfo logo de ter unha renda de quince minutos no terceiro acto.
Os de Natxo Lezkano perderon por trece puntos o último cuarto (16-29) e a vitoria adxudicoulla o conxunto aragonés por catro de diferenza (82-86).
Ata ese tramo do partido, os lucenses asinaran boas porcentaxes no tiro exterior, pero as bonecas deixaron de ter precisión e cederon a sétima derrota da tempada.
Un guión parecido foi o da outra derrota en casa, a do partido aprazado da primeira xornada do campionato, ante o Divina Seguros Joventut.
Os breoganistas entraron no último cuarto con dous puntos de renda (58-56), pero acabaron perdendo o partido por sete (69-76).
O Breogán só foi capaz de superar nos dez minutos finais ao Movistar Estudantes, ante o que asinou a primeira vitoria do curso na cuarta xornada (86-79), con dous puntos ao seu favor no último período (21-19).
Na outra vitoria que logrou esta tempada, ante o Monbus Obradoiro, na sexta xornada, o equipo lucense resolveu nos dous primeiros cuartos (16-9 e 15-9) e mantivo o tipo nos dous últimos con empate (20-20 e 18-18).
O resto dos partidos resolvéronse con derrota dos galegos no partido e tamén no último período: ante Iberostar Tenerife (29-20), o Herbalife Gran Canaria (21-19), o San Pablo Burgos (26-23), o UCAM Murcia (20-11) e o Unicaja Málaga (25-24).
Un dos motivos que poden explicar o bajón dos lucenses nos minutos finais ten que ver co estadio físico dos seus xogadores, xa que as lesións lastráronlle desde a pretemporada, algúns dos seus integrantes non poden competir ao cento por cento por molestias e as rotacións son limitadas.
