O Cafés Candelas Breogán xa é oficialmente club da ACB e participará na liga Endesa 2018-19, despois de que este luns a Asemblea Xeral da Asociación de Clubs de Baloncesto aprobase a súa admisión como novo socio. O BAXI Manresa tamén formará parte a próxima tempada da máxima categoría do baloncesto español.
Ambos os clubs conseguiron o ascenso desde a LEB Ouro a pasada campaña e presentaron a documentación e cantidades necesarias dentro do prazo para a súa inscrición na competición, que foi analizada favorablemente polos auditores e aprobada de forma unánime pola propia ACB.
O retorno á liga Endesa 2018-19 do Breogán supón a volta á competición dun club histórico. Entre o conxunto lucense e o Manresa acumulan 2.174 partidos na elite do baloncesto español ao longo da súa historia.
O CB Breogán é duodécimo na táboa histórica con 760 encontros disputados (156 en Liga Nacional e 604 en ACB). No seu caso, retorna á liga 12 anos logo do seu descenso deportivo.
O Basquet Manresa é o sexto club con máis partidos (1.414) entre Liga Nacional (344) e ACB (1.070) e un dos únicos sete clubs que se proclamou campión de Liga, precisamente fai 20 anos.
O @Cafescandelas Breogán xa é equipo de @ACBCOM a tódolos efectos! Grazas a tódos o que o fixeron posible! #forzabreo #SomosACB #FagamosEquipo https://t.co/UbI57o2eO6 pic.twitter.com/Tnhb91bLRv
— Breogán (@CBBreogan) 16 de xullo de 2018