O Ribeira Sacra Breogán está preparado para afrontar a carreira cara ao ascenso á liga ACB, que se iniciará mañá (20.45 horas) no Pazo dos Deportes de Lugo, co Peñas Huesca como primeiro rival. Así polo menos veo o técnico lucense, Lisardo Gómez. «Ao equipo estou a velo moi ben. O adestramento de onte (polo martes) foi realmente bo, a xente está moi concentrada e as sensacións son moi positivas», dixo o técnico do equipo lucense en rolda de prensa.
Incluso ao adestrador breoganista non parece inquietarlle a presión de empezar en Lugo unha eliminatoria a só tres partidos. «Está claro que temos toda a presión e moito que perder. Pero bendita presión de ter que xogar na nosa pista. Aquí o público aperta e máis este ano, en que hai moi boa comuñón entre a afección e o equipo. Para nós é importante xogar en casa e, desde logo, o equipo está a desexar que empece o partido», dixo.
Quim Costa, adestrador do Peñas Huesca: «A maior forza agora nos play off está na mentalidade»
- Quim Costa considera ao Ribeira Sacra Breogán como un equipo «superior» ao seu, polo que o técnico catalán do conxunto aragonés considera que os seus xogadores «terán que espremer as posibilidades xogando ao límite das súas forzas tanto en defensa como en ataque».
Dani Rodríguez tampouco se exercitou onte
Dani Rodríguez segue sen exercitarse cos seus compañeiros e dificilmente farao antes do encontro de mañá. Roeland Schaftenaar non se adestrou na mañá de onte por mor dunha hemicrania, que tamén lle impediu adestrarse na mañá de luns. Con todo, o holandés puido participar no adestramento da tarde, que por certo se realizou a porta pechada.
