Balseiro felicita o atleta sarriao Iván Cáceres e reivindica o seu exemplo

O delegado territorial da Xunta en Lugo, José Manuel Balseiro, recibiu este venres na sede da Administración autonómica o triatleta sarriao Iván Cáceres, que acaba de proclamarse campión do mundo de ironman no seu grupo de idade —de 30 a 34 anos—. A proba disputouse na localidade hawaina de Kona.

Balseiro destacou o exemplo que representan deportistas como Cáceres e que encarnan valores tan importantes como "o esforzo, a superación e a constancia para acadar un obxectivo".

O delegado da Xunta, acompañado entre outros polo xefe de servizo de Deportes de Lugo, Manuel Otero, felicitou o triatleta polo resultado obtido en Hawai e desexoulle máis éxitos deportivos.