Oito triplos doutros tantos intentos é a marca de Mo Soluade nos dous últimos encontros. No último, en Huesca, ademais do seu inmaculado 4 de 4 desde máis aló da liña de 6,75 metros, logrou anotar o único tiro de dous que realizou, capturou 3 rebotes e repartiu cinco asistencias. Foi o xogador máis valorado do equipo lucense e todo iso en pouco máis de 20 minutos en pista.
O seu rendemento nos dous últimos encontros parece unha confirmación de que o xogador británico deixou atrás as molestias físicas que o lastraron nas primeiras xornadas. "Atópome mellor fisicamente e espero seguir mellorando. O dos meus números foi grazas aos meus compañeiros porque confían en min. O meu desexo é seguir sumando cada día máis cousas para o equipo", comentou o base breoganista.
Con respecto ao seu equipo, Soluade recoñece a importancia do triunfo conseguido en Huesca. "É que nos facía falta gañar, sobre todo polas nosas sensacións. Está claro que aínda queda moito por traballar e seguimos facéndoo día a día. Eu vexo o equipo máis liberado e convencido de cal é o camiño", dixo.
Mo Soluade opina que a intensidade será clave para que o Breogán gañe ao Marín
A situación de cinco partidos gañados e catro perdidos non preocupa ao xogador breoganista. Él formaba parte do equipo que, tamén dirixido por Diego Epifanio, logrou o ascenso á ACB co San Pablo Burgos. "Alí chegamos a estar con cinco partidos gañados e cinco perdidos. Despois corrixíronse cousas, empezamos a ir moito mellor e fomos para arriba", recorda Soluade.
Ante o futuro inmediato do Leche Río Breogán, o base non ten ningunha dúbida. "Temos que cambiar un pouco a mentalidade, ser máis fortes como equipo. Despois, os dous próximos partidos hai que gañalos si ou si, aínda que tendo en conta que nesta Liga pode pasar de todo e ao rival sempre hai que tratalo co máximo respecto", sinala. A este respecto, avanza que ante o Marín o vindeiro sábado o Breogán vai saír a por todas desde o principio, con moita intensidade". "É importante que eles non vexan ningunha posibilidade de poder meterse no encontro", engade.
Sobre Filip Toncinic, compañeiro de Soluade no Burgos e debutará en Lugo co Marín, dixo Soluade que "é un bo xogador con moita experiencia. Pero fichen a quen fichen para nós non cambia nada".
