Ataque reducido

Unha defensa consolidada ante un ataque líder pero case sen efectivos. O Lugo, que conta cunha zaga que foi crecendo ao longo da campaña, cun sistema interiorizado polos futbolistas, recibirá o mércores 19 (21.00 horas) no Ángel Carro a un Almería sen a súa grande estrela ofensiva e pendente do estado físico das dúas alternativas a Umar Sadiq.

O dianteiro nixeriano, máximo realizador do equipo indálico con oito dianas, atópase concentrado coa súa selección, Nixeria, na Copa de África, polo que non estará no estadio Ángel Carro no duelo aprazado da xornada número 21 da liga de Segunda División.

Sadiq é unha baixa cuantiosa para o Almería. O punta nacido en Kaduna en febreiro de 1997, ademais de ser o sétimo na lista do pichichi de Segunda, é o segundo xogador con máis asistencias de gol xunto a Borja Sánchez, con seis; o segundo que máis dispara na categoría, con 50 tiros a porta; e o que máis caneos fai, con 84, por diante do branquivermello Gerard Valentín, que suma 83.

Sen a súa gran referencia no ataque, o técnico do equipo andaluz, Joán Francesc Ferrer, Rubi, terá que estar pendente do estado físico das súas dúas alternativas: o portugués Dyego Souza e o onubense Juan Villar.

Os dous xogadores permanecen na enfermería do club andaluz por problemas físicos. Villar sufriu unha lesión muscular o pasado 7 de xaneiro e xa non puido entrar na convocatoria de Rubi para o duelo ante a UD As Palmas, que acabou con 1-1. O ex do Cádiz disputou seis partidos, ningún como titular, e marcou un gol.

O Almería está pendente do estado físico das dúas alternativas a Umar Sadiq

Tampouco estivo no Estadio de Gran Canaria Dyego Souza, que sufrira unha picada no xemelgo no duelo copeiro ante o Elxe do pasado 6 de xaneiro. O luso disputou 13 encontros, pero só dous de inicio, e conseguiu perforar a portería rival en catro ocasións.

Sen os seus tres dianteiros puros, Rubi tivo que situar na punta do seu ataque o belga Largie Ramazani, que se desenvolve nos costados, preferentemente no zurdo, pero que podería ter que repetir no centro da ofensiva indálica no Ángel Carro.

O Lugo, pola súa banda, conta cunha defensa sólida, que foi minimizando o impacto dos seus erros individuais e que se mostra cada vez máis consolidada. É a novena zaga que menos encaixa de Segunda e só o Mirandés en Anduva conseguiu facerlle máis de dous goles ao porteiro branquivermello. Ademais, suma cinco duelos sen sufrir máis dun tanto.

Cun esquema de tres centrais e dous laterais en fase defensiva, protexido por dous centrocampistas que se pregan por dentro e coas axudas dos extremos, o Almería terá complicado atopar espazos para desbordar a defensa lucense. Máis aínda se non conta cos seus principais arietes nun duelo que chega nun bo momento dos de Rubén Albés.