O Río Breogán, tras a disputa de catro xornadas, asombra e sorprende, case a partes iguais, na liga Endesa 2021-2022. Non se trata tan só de destacar a bagaxe de tres triunfos e unha soa derrota senón, e sobre todo, ante quen –fronte o terceiro e sexto clasificado da pasada tempada, un rival directo o campión de Liga– e como se produciron.
O breoganista é o conxunto con mellor average xeral da liga cun +67, 13 puntos máis que o Real Madrid, vixente subcampión, e 17 máis que o Barcelona, actual campión, pero ademais tras exhibir un baloncesto de alto nivel.
O sorprendente non é que este saldo na cuarta xornada veña do único ascendido nesta tempada senón porque o Breogán, logo da pretemporada, iniciaba a liga xerando dúbidas en tres aspectos fundamentais: a defensa (no trofeo Entrerrías o Obradoiro endosoulle 99 puntos e o Joventut, 84), a escasa ameaza en triplo e o posible rendemento dos seis xogadores que se mantiñan no equipo do ascenso.
Pois ben, a resposta do equipo non puido ser máis contundente. O Río Breogán é o segundo conxunto da liga Endesa que menos puntos leva encaixados con 278 (só 69,5 por partido); unicamente o Real Madrid recibiu menos, 266 en total.
Musa, Bell-Haynes, Kalinoski e Cruz aparecen entre os primeiros en estatísticas
O conxunto breoganista é o segundo en canto a triplos anotados, con 11,2 dunha media que só supera o Fuenlabrada con 12. Ademais, o celeste non só é o que máis canastras de tres consigue senón que tamén é o que presentan o maior acerto da competición cun máis que notable 42,8 por cento, un punto por encima do segundo equipo nesta faceta, o Fuenlabrada con 41,7 por cento.
E en canto ao rendemento dos xogadores que permanecen no persoal, e salvo no caso de Adam Sollazzo, que polo menos de momento non entra nas rotacións do equipo, todos os demais están a responder a un alto nivel, ata o punto de que o Breogán logrou manter unha intensidade e un nivel constante durante os 40 minutos.
ESTADÍSTICAS RELEVANTES. O gran inicio dos celestes lévalle a brillar practicamente en todas as clasificacións máis relevantes. En canto a valoración total, o Breogán (93,75 puntos) só é superado polo Barcelona (99,50).
A gran porcentaxe nos lanzamentos triplos, xa citado, ten continuidade tamén co tino que os breoganistas mostran no lanzamento de dous puntos, onde só o Barça (60,3%) e o Unicaja (57,2) mostraron mellor porcentaxe que o equipo de Paco Olmos, 56,2%.
O control que ten o conxunto lucense das súas posesións é outra das facetas a destacar. O Gran Canaria, con 10,5 perdas por encontro, e o Bilbao Básket con 11, son os dous equipos que desperdician menos posesións que o Breogán (11,5).
Individualmente, como é lóxico, a excelente traxectoria ten tamén reflexo nas estatísticas individuais. Na que establece as vantaxes que un equipo obtén no marcador coa presenza dun xogador determinado en pista, o Breogán ten cinco xogadores entre os doce primeiros: Lukovic, Trae Bell, Dzanan Musa, Sergi Quintela e Taylor Kalinoski.
Musa é o sexto máximo anotador da liga, Bell-Haynes o cuarto en asistencias, Kalinoski é o terceiro con máis triplos anotados (3,3), Musa o sexto con mellor porcentaxe de tres (61,5) e Iván Cruz é o sexto xogador con maior acerto en tiros de dous (80%).
Baixa ante o Betis. O á-pivote serbio lesionouse ante o Barcelona, unha escordadura de nocello, e aínda que desde o inicio descartouse calquera afección ósea ou de ligamentos, a evolución non foi a esperada e non puido xogar contra o Betis.