O Aranjuez proclamouse onte campión da Copa de España de Novas Promesas Infantís ao lograr 1.872 puntos na competición celebrada na localidade lucense de Portomarín, onde o Círculo Mercantil e Industrial de Sevilla foi segundo, con 1.556, e o Sant Antoni de Eivissa, terceiro con 1.514 puntos.
Un total de 85 clubs tomaron parte na cita sobre 3.000 metros, celebrada no encoro de Belesar, coa participación de máis de medio milleiro de padeeiros (601 en total), con 834 embarcacións, pertencentes a 85 clubs de 16 comunidades autónomas.
Ademais dos tres equipos que lograron copar o podio, o Club Fluvial de Lugo foi cuarto con 1.353 puntos e a Ría de Betanzos quinto con 1.333.
GALICIA. Un total de 14 embarcacións galegas lograron o podio conseguindo dúas medallas de ouro na categoría home infantil A k-1, e home infantil B k-2. Ademais obtiveron catro medallas de prata en muller e home infantil B c-2; muller infantil A c-2 e home infantil A c-2. Así mesmo sumaron oito medallas de bronce: muller infantil A c-1, home infantil B k-1 e c-1, muller infantil B c-2, muller infantil A k-2 e c-2, e home infantil A e B k-2.
LUGO. A mellor posición de piragüistas lucenses onte foi a conseguida pola parella formada por Emily Fernández e Aida Fonseca, quen na proba feminina infantil A k-2 lograron a sexta praza, cun tempo de 15:44.22 segundos.
En sétima posición acabou Lucía Lodeiro Cabado, tamén do Club Fluvial, na proba infantil B k-1, cun tempo de 16:25.54 segundos. Pola súa banda, o padeeiro lucense Lucas Gómez García, do Club Fluvial, acabou en sétima posición en infantil A k-1, parando o cronómetro en 14:39.28 segundos.
A propia Emily Fernández tamén callou unha boa actuación competindo de xeito individual na proba A k-1, cunha undécima posición e un tempo de 16:18.23 segundos. Ademais, Lucia Lodeiro e Aitana Parga (Club Fluvial) finalizaron a proba B k-2 na décimo cuarta posición, cun tempo de 16:44.80. Cumpriron un bo papel a parella formada por Lucas Gómez e Daniel Moscoso, quen na proba de infantil A k-2 acabaron na décima posición, cun cronómetro de 14:09.28 segundos.
Outras actuacións destacadas asináronas padeeiras como Paula Racamonde Parada, do Club Fluvial, cunha duodécima posición en infantil B c-1, Yaroslav Alforov (Cidade de Lugo), tamén duodécimo en infantil B k-1, Juan Augado Bellón (Club Fluvial), undécimo en infantil B c-1 ou Alejandro Pérez, tamén duodécimo na última proba mencionada.
Medio século despois
Os participantes competiron no pantano artificial construído no ano 1963 no río Miño. A cita volveu a Portomarín logo de case medio século, xa que a última de carácter nacional remóntase ao ano 1974. Portomarín se acolleu probas de carácter autonómico nas últimas catro décadas.
Calendario oficial
A deste sábado foi unha das probas que forman o calendario nacional oficial e é unha das poucas que non teñen lugar en escenarios como Verducido (Pontevedra), A Cartuxa (Sevilla) ou Trasona (Asturias), onde tradicionalmente se celebran a maioría de eventos e controis de carácer nacional. Foi unha cita histórica que devolve ao encoro de Belesar a súa relevancia deportiva.
