Catro derrotas consecutivas, a última en San Sebastián especialmente dura, levaron ao Movistar Estudiantes a implicarse directamente na loita pola permanencia. En realidade, o equipo estudantil estivo durante toda a tempada tonteando coa zona perigosa. Sen ir máis lonxe hai só catro xornadas o próximo rival do Cafés Candelas Breogán estaba separado en tres triunfos da penúltima posición, que ocupaba o Murcia con seis triunfos. Unha distancia que, en realidade, parecía máis que un cómodo colchón, sobre todo se se consideraba que nas xornadas seguintes se enfrontaría cos dous conxuntos que ocupaban as últimas prazas, Murcia e Delteco.
Dous encontros que deberían ser unha táboa de salvación saldáronse con dúas duras derrotas para o conxunto de Josep María Berrocal, 86-110 na súa cancha fronte aos murcianos, e 93-92 na pista do Delteco nun partido que os madrileños dominaban por 22 puntos cando o duelo chegou ao descanso (31-53).
As dúas derrotas mudaron o que podería ser unha paisaxe totalmente despexada por outra chea de sombras, e de dúbidas. Ata o punto de que un novo fallo, nesta ocasión ante o Cafés Candelas Breogán, podería situalo ao final da xornada en posicións de descenso.
Os importantes e ambiciosos cambios realizados no persoal desde o inicio da competición non serviron para que o equipo adquirise a regularidade necesaria para vivir sen sobresaltos na liga Endesa. En realidade persistiron os mesmos erros.
A chegada de Shayne Whittington -fichado desde un Andorra que para compensar a súa ausencia se fixo cos servizos de Jerome Jordan- mellorou o xogo interior pero non o suficiente como para alcanzar a consistencia e equilibrio que dentro das zonas reclamaba o equipo. Tampouco o fixo coa chegada de Fotios Lampropoulos.
Moito máis efectiva foi a chegada do aleiro italiano Alessandro Gentile. Tampouco provocou que o Estudiantes mostrase máis regularidade defensiva pero, polo menos, fixo que a súa ameaza ofensiva estivese á altura dos mellores equipos da competición, con Brizuela e o propio Gentile como o segundo e terceiro anotador da liga e Omar Cook como o segundo asistente.
A lesión do italiano foi un grave tropezón que intentaron compensar coa chegada do congoleño Junior Etou.
Para o máximo mandatario, "o equipo vaise volcar, como fará tamén a afección. Estamos seguros de que o WiZink Center estará a rebentar e que o equipo responderá á afección coma se dúbida van responder eles".
O adestrador, pola súa banda, recoñeceu que centraba a súa máxima preocupación no traballo defensivo do seu equipo, "o mesmo equipo que defendeu ben recibindo 31 puntos na primeira parte recibiu 64 na segunda. Temos que ser o equipo da primeira", dixo recordando o sucedido ante o Delteco.
Omar Cook considera que o seu equipo debe de estar tranquilo pero "centrados en facer o noso traballo", mentres que o segundo máximo anotador da liga Endesa, Darío Brizuela, ademais de insistir no apoio ao público, considera vital que o seu equipo poida "estar ben os 40 minutos". "É o que temos que aprender, e máis en partidos desta transcendencia", engadiu.
