O Lugo enfrontarase a dez dos doce equipos que están por baixo na clasificación

O partido do próximo sábado 23 no Ángel Carro ante o Tenerife abrirá de xeito oficial a segunda volta para o Club Deportivo Lugo. Será o primeiro dos once encontros que o equipo de Mehdi Nafti xogará no seu feudo ata o final da competición.

Once partidos nos que o club branquivermello deberá facerse forte para asegurar o obxectivo da salvación e nos que recibirá, coa excepción do líder Espanyol, a dez dos doce equipos que actualmente se atopan por baixo na clasificación: Málaga, Mirandés, Fuenlabrada, Logroñés, Tenerife, Zaragoza, Sabadell, Cartaxena, Alcorcón e Castelló. É dicir, unha segunda volta en casa contra unha ampla maioría de rivais directos e outros equipos que, a recado, pelexarán cos branquivermellos no tramo final da liga de Segunda División.

Será unha curiosa segunda metade de tempada na que o equipo de Mehdi Nafti recibirá aos rivais con peor rendemento ao longo da primeira volta e que, sobre o papel, achanda un camiño que aínda que arrincou do peor xeito posible nas primeiras cinco xornadas, o francotunecino endereitou con 25 puntos en 14 partidos. O rexistro supera con amplitude o logrado polo técnico que empezou o curso, Juanfran García, quen acumulou só tres puntos nas primeiras cinco xornadas.

A primeira das visitas que recibirá o Lugo será a do Tenerife, o vindeiro sábado 23 ás 18.15 horas, un rival directo na clasificación que hoxe se atopa seis postos por baixo pero a tan só dous puntos de distancia.

O seguinte partido no Ángel Carro será o fin de semana do 7 de febreiro ante o Espanyol, na que será o único encontro en casa ante un rival da zona alta. Dúas xornadas despois, na xornada número 26, os de xogadores de Mehdi Nafti recibirán ao Logroñés, un equipo que, como o Tenerife, é rival directo dos branquivermellos e que hoxe suman só un punto menos.

DOUS SEGUIDOS EN CASA. Na xornada número 28 será a quenda do Fuenlabrada, actual décimo cuarto clasificado cun punto menos que o Lugo. Será o primeiro dos dous partidos no Ángel Carro que xogarán os branquivermellos, porque sete días despois recibirán ao Sabadell, un equipo que saíu da zona de descenso grazas ao empate, precisamente ante os de Nafti a pasada xornada.

Dúas datas logo da visita dos cataláns tocaralle ao antepenúltimo clasificado, un Alcorcón que viaxará a Lugo a mediados do mes de abril. Despois, e xa en maio, chegarán as tres últimas visitas ao Ángel Carro, nas xornadas 37, 39 e 41, de Zaragoza, Mirandés e Cartaxena respectivamente. Serán os últimos rivais que o equipo branquivermello acollerá no seu feudo e ante os que despedirá a tempada, quen sabe, se diante da súa afección.

O equipo maño ocupa a posición número 17 con oito puntos menos que os branquivermellos, mentres que o Mirandés é un rival directo grazas aos seus 27 puntos e a súa décimo terceira praza. O Cartaxena, último rival en casa, marca o horizonte do descenso, con 20 puntos na primeira volta.