O boxeador Alberto Piñeiro, 'El Piña', está este venres ante a súa gran cita, a súa gran oportunidade. O lucense mostrouse o xoves convencido e confiado nas súas posibilidades a moi poucas horas de loitar este venres polo título nacional do peso medio nunha velada que terá lugar no Palacio Municipal dos Deportes de Lugo a partir das 22.30 horas.
"Quero dar unha vez máis as grazas a toda a afección lucense e a todos os patrocinadores e colaboradores, sen eles nada sería posible, tampouco estar aquí e agora mesmo a unhas horas de loitar por un título nacional. A afección está aí sempre, axudando e apoiando, igual que por suposto todo o meu equipo, esa xente que traballou moi forte durante este tempo e me que me preparou moi ben", dixo.
Alberto Piñeiro recoñeceu que se ve preparado e incluso deixou ver a ansiedade lóxica de que chegue xa o momento do combate e dalo todo. "Levo dous meses pensando en Dani Pérez e estou preparado, moi preparado. Estou seguro de que toda a xente verá un gran espectáculo. Quero insistir en agradecer todo o traballo do meu equipo, que me preparou e permitiu dar o peso sen problema, e manter un adestramento forte ata o último momento. As sensacións son realmente boas", indicou.
Alberto Piñeiro mostrouse feliz durante a cerimonia da pesada, que tivo lugar o xoves pola tarde nunha sala do restaurante España. No medio dunha gran expectación, tanto o lucense como o madrileño Daniel Pérez Saído tiveron que pesarse e todo estivo baixo o esperado. Alberto Piñeiro pesou 72 quilos, mentres que Daniel Pérez Saído chegou ata os 71,600 quilos. O último cerimonial previo ao día do combate estaba xa resolto e Alberto Piñeiro, 'El Piña', que chegou lucindo unha camiseta do Club Deportivo Lugo, volveu mostrarse confiado ante os afeccionados.
O rival desta noite para Alberto Piñeiro, Daniel Pérez Saído, tamén falou tras a pesada, das súas sensacións de cara a este combate. "Tiven unha lesión, pero estiven un tempo adestrando e preparándome. A verdade é que me gusta Alberto como rival porque é un boxeador que sempre dá a cara e vén con moitas ganas. Non teño ningunha dúbida de que se verá unha gran pelexa", manifestou.
Todo está preparado entón para un día moi esperado polos afeccionados ao boxeo en Lugo e unha data especial para Alberto Piñeiro. O Palacio Municipal será a testemuña do novo campión do peso medio.
