O uruguaio Nicolás Albarracín, extremo do CD Lugo, mostrouse "feliz" por estrear a súa conta de goles en España e tamén ambicioso respecto dos obxectivos do equipo na recta final do campionato, xa que non se conforma coa permanencia en LaLiga 1/2/3.
O charrúa, que foi suplente ante o Alcorcón este sábado, iniciou a remontada do Lugo (2-1) a falta dun cuarto de hora para o final. "Estou feliz polo gol e tamén polo triunfo. Foi unha remontada importante para nós, faltan poucos partidos e non se pode perder en casa", comentou o futbolista.
"Eles expuxeron un bo partido, non foi o mellor noso co balón, pero en casa témonos que facer fortes e hai partidos que vas gañar xogando non tan ben", recoñeceu.
Albarracín explicou que non se conforma con certificar a permanencia, algo que, virtualmente, os branquivermellos conseguirán cun novo triunfo. "Sabemos que temos que chegar aos 50 para a salvación, pero non nos imos a conformar con iso. Temos que ir paso a paso, partido a partido, que aínda falta", sostivo.
O xogador suramericano, que só participara nun dos catro partidos anteriores, afirmou que "todos" no Lugo están "preparados" para xogar e ao que lle toque teno que facer do "mellor xeito"