Seis dos sete equipos lucenses con dereito a disputar esta tempada a Autonómica Preferente formalizaron xa a súa inscrición para a competición express deseñada pola federación galega para discernir os ascensos a Terceira División. O único club que renunciou a disputar o campionato, sabendo que non haberá descensos e que no próximo exercicio poderá competir de novo en Preferente, é o Escairón, mentres que o Foz, o Ribadeo, o Santaballés, a Residencia, a Sarriá e o Lemos estarán na grella de saída, á espera da configuración dos grupos e o calendario, que se dará a coñecer posiblemente esta mesma semana.
O Escairón foi un dos únicos catro clubs do grupo Norte que decidiu non saír a competir, xunto a tres da provincia da Coruña: Galicia Mugardos, Sigüeiro e Boimorto.
Ademais dos mencionados sete representantes lucenses, en Preferente Norte están xa inscritos outros 12 clubs da Coruña: Montañeiros, Vitoria, Arteixo, Betanzos, Laracha, Sofán, San Tirso, Xallas, Dubra, O Pino, Noia, Boiro e Poboa.
BASE. Ningún dos clubs lucenses con praza nas competicións autonómicas de base deixará de competir esta tempada a pesar das restricións do covid. Haberá representación provincial na liga Galega xuvenil, División de Honra cadete, Liga Galega cadete e Liga Galega infantil.
Na liga Galega xuvenil están inscritos a Residencia, o Viveiro e o Vilalbés B. O CD Lugo A será o único representante provincial na División de Honra de cadetes, amentas que o Lugo B, o Vilalbés, a SD Viveiro e a SD Ribadeo formarán parte da liga Galega desta mesma categoría. Na liga Galega infantil, a representación lucense correrá a cargo do CD Lugo, o SDC Residencia e a SD Viveiro.
Entre as sete competicións autonómicas que arrincarán só houbo 10 renuncias dos 149 clubs con praza, o que representa o 7 por cento do total. Nestas competicións tampouco haberá descensos.
Renuncias. As únicas renuncias foron as da Faísca, Valladares, Tomiño e Tordoia.