O Cafés Candelas Breogán xógase moitas das súas opcións de permanencia na súa visita o sábado, ás 18.00 horas no Donostia Arena, ante o Delteco Gipuzkoa. Para o conxunto lucense, que no que vai de tempada só foi capaz de gañar a domicilio ao Fuenlabrada, non hai máis alternativas. Necesita gañar onde practicamente o fixeron todos os equipos.
O Delteco, a pesar de estar distanciado da zona de permanencia en tres vitorias, non se rende e, polo tanto, afrontará o encontro ante o equipo lucense como a súa última opción para intentar engancharse á loita pola permanencia. De todos os xeitos, a realidade indica que a cancha do conxunto guipuscoano é a máis propicia da liga Endesa á hora de buscar un triunfo.
O conxunto que dirixe Sergio Valdeolmillos só gañou dous partidos como local, ante o Herbalife Gran Canaria (74-63) na sexta xornada e fronte ao San Pablo Burgos (92-83) na oitava, dos dez encontros que xogou co público a favor. A última vitoria na súa pista, a conseguida ante o Burgos, produciuse o 10 de novembro de 2018, é dicir, o próximo rival do Breogán leva nada menos que catro meses sen gañar a favor de ambiente.
De todos os xeitos, o do ambiente no caso dos partidos do Delteco soa case a eufemismo. Nunha instalación con capacidade para once mil espectadores non chegou a cubrir as dúas mil localidades en tres partidos, ante Tenerife (1.798), Herbalife (1.749) e Manresa (1.722); noutros catro non alcanzaron os tres mil, como ocorreu fronte a Fuenlabrada (2.056), Valencia (2.762), Zaragoza (2.011) e Unicaja (2.316). As mellores entradas producíronse fronte ao Barça (3.987) e ante o Burgos (4.033), aínda que neste último encontro había practicamente máis seguidores do conxunto visitante que do local. Polo tanto, a presión ambiental non será nin moito menos un problema para o equipo de Natxo Lezkano.
O conxunto vasco, ademais de último clasificado, con só catro triunfos en 22 xornadas na clasificación xeral, tamén o é nos apartados estatísticos máis relevante. O equipo de Valdeolmillos é o conxunto que menos anota, cunha media de só 73,2 puntos por encontro; é o equipo con peor porcentaxe nos tiros de tres puntos con só un 31,9% de acertos. Máis nada que o Joventut supérao no número de perdas e con respecto aos lanzamentos de dous puntos non chega a ser o equipo máis desacertado, cun 51%, porque o supera o Breogán. Este non chega a anotar nin a metade dos lanzamentos de dous puntos (47,3%).
En definitiva, non se pode atopar na liga Endesa un rival máis adecuado nin unha cancha máis propicia para intentar sumar unha vitoria, que para o futuro do Breogán sería vital. Por moito que para o Delteco este encontro sexa a súa última oportunidade.
