Poucos lograron que o centro do campo se converta na área como o Lugo. Poucos como o club branquivermello lograron afacerse a converter 50 metros en case 11. Poucos como o equipo lucense foi capaz de marcar desde o centro do campo dúas tempadas consecutivas para sumar claros triunfos ante dous históricos: o Zaragoza esta campaña e o Spórting a pasada.
Carlos Pita uniuse ao meta Juan Carlos como goleador desde a medular. O meta fixo o 3-1 fronte ao Spórting a campaña pasada, o 20 de xaneiro de 2018, mentres que o herculino impulsou ao Lugo de lonxe na Romareda para que o seu equipo iniciase o camiño dun triunfo necesario.
No minuto 21, o capitán branquivermello tomou un balón no círculo central, cruzou a liña de medios e observou ao meta do Zaragoza. Cristian Álvarez estaba máis adiantado que o punto de penalti nunha posición que lle permitise estar atento para chegar a un posible balón en longo para Dongou, Cristian ou Iriome. Pita observou a situación do porteiro e decidiu disparar con forza. O balón realizou unha parábola e baixou aos poucos mentres o meta recuaba coa esperanza de chegar a despexar un balón que acabou na súa portería.
O tanto mudou o escenario do partido, puxo ao Lugo en vantaxe lonxe do Ángel Carro por primeira vez na liga e achegou a confianza necesaria para dominar ao Zaragoza. "Vin a Cristian adiantado, tratei de aproveitar a situación e por sorte foi un gol que nos deu tranquilidade e confianza para xogar como o estabamos facendo, ademais de cambiar a dinámica que estabamos a ter nese momento", dixo Pita.
O mediocentro non é un habitual na tarefa de marcar goles. O coruñés suma 18 dianas nas nove campañas que leva no Ángel Carro. O curso futbolístico que máis tantos fixo foi no 2011-2012, con 5, mentres en Segunda División logrou 3 na 2013-2014 e 2017-2018. Para Pita o tanto poida que sexa "un dos últimos" que quedan na recámara, xa que non é un xogador que "acostume a marcar goles e menos dese xeito", aínda que se mostrou moi orgulloso dunha diana de bela factura "nun escenario como A Romareda".
