martes. 04.08.2020 |
El tiempo
martes. 04.08.2020
El tiempo

A gran cita de decembro

Un momento da presentación da carreira Lugo Monumental. XESÚS PONTE
Un momento da presentación da carreira Lugo Monumental. XESÚS PONTE
A decimoséptima edición da carreira popular Lugo Monumental disputarase o domingo 15 ás 11.00 horas. O prazo de inscrición para a mesma finaliza o próximo día 10

A decimoséptima edición da carreira popular Lugo Monumental disputarase o domingo 15 a partir das 11.00 horas. A competición pecharase ás 12.00 horas coa carreira de adultos, que contará co percorrido tradicional dun total de dez quilómetros, con saída na Mosqueira e chegada na Praza Maior de Lugo.

A competición foi presentada este mércores nun acto que contou coa presenza do concelleiro de Deportes de Lugo, Miguel Fernandez; Igor de las Heras, director da área de Caixabank Lugo; Luis Barrio, subdirector de publicidade do diario El Progreso, e Ana Barga, en representación da Sociedade Protectora de Animais e Plantas de Lugo.

Durante a presentación, Miguel Fernandez destacou o éxito desta proba, unha cita deportiva que é un referente en Lugo, e "cunha notable acollida" por parte dos deportistas galegos e doutros lugares de España. O concelleiro de Deportes recordou a importancia deste tipo de eventos deportivos para os amantes do atletismo e aproveitou para animar os lucenses a participar nesta carreira, que aspira a chegar aos 1.500 atletas. "Destinarase un euro de cada inscrición na categoría de adultos á Sociedade Protectora de Animais e Plantas de Lugo", anunciou tamén Miguel Fernández.

Un euro da inscrición dos adultos irá para a Protectora de Animais

INSCRICIÓNS. Os interesados en participar na proba teñen que saber que o prazo para tomar parte na mesma concluirá o día 10. Hai varios tramos e prezos en función da data na que se realice a inscrición. Así, se se fai antes do día 6 o prezo será de oito euros máis 2 euros polo aluguer do chip para os que non o teñan; mentres que os que se inscriban entre os días 7 e 10 teñen que abonar un total de dez euros, máis os dous euros polo aluguer do chip da proba. Os interesados teñen toda a información na seguinte páxina web: www.10klugomonumental.com. Hai que destacar que a inscrición nas categorías menores é gratuíta.

Ademais dos participantes na categoría de adultos, tamén haberá outras probas e clasificacións en función da idade dos participantes, que son as seguintes: categoría mini (de 5 a 7 anos), categoría sub-10 (de 8 e 9 anos), categoría sub-12 (de 10 e 11 anos), categoría sub-14 (de 12 e 13 anos) e categoría sub-16 (de 14 e 15 anos). A saída da proba de mini terá lugar ás 11.00 horas cun percorrido de 370 metros; mentres que ás 11.10 sairán os das categorías sub-10 e sub-12 con 700 metros de percorrido. A quenda para os atletas das categorías sub-14 e sub-16 celebrarase ás 11.20 horas cun percorrido de 1.500 metros.

A gran cita de decembro
comentarios