O Obradoiro afronta o seu primeiro derbi galego na máxima categoría no seu mellor momento da actual tempada. O equipo compostelán logrou gañar tres dos últimos catro partidos, o que lle serviu para subir posicións na táboa da liga Endesa -agora é undécimo con nove triunfos- e separarse en catro triunfos da última posición de descenso.
O bo momento de xogo e a tranquilidade que lle outorga a súa posición na táboa son dous aspectos que deben de xogar a favor do conxunto compostelán ante un rival como o Cafés Candelas Breogán, moito máis necesitado.
Non é previsible que o parón ligueiro poida influír de forma negativa no rendemento do Obradoiro, entre outras cousas porque a súa melloría é máis produto dun positivo crecemento como equipo que por un acerto máis ou menos puntual.
Os santiagueses gañaron nas últimas xornadas ao Unicaja (89-86) e Murcia (91-79) no Fontes do Sar e ao Valencia (87-94) a domicilio. Nestes encontros déronse unha serie de factores moi positivos e a ter en conta. Por exemplo, ante o Valencia o Obradoiro só perdeu tres balóns -a súa media está por encima dos doce-, unha melloría que xa apuntou ante o Murcia, 5 en total e incluso ante o Unicaja con 7.
Tamén foi positivo o feito de que o seu máximo anotador -e o terceiro da competición- Kostas Vasiliadis atopara acompañantes na anotación, en especial por parte do pivote Brodziansky -22 puntos ante Valencia e 19 fronte a Unicaja-, o que axuda ao equipo cun maior equilibrio ofensivo do que tamén se están favorecendo outros xogadores como David Navarro.
O Obradoiro é un equipo que limita moito os seus erros. Xa está comentada a redución no número de perdas pero ademais mantén unha alta porcentaxe nos tiros de tres puntos -é o segundo mellor da liga, tras o Barça Lasa- cun 37,4% de acertos e, sobre todo, nos tiros libres. O de Moncho Fernández é o equipo máis certeiro nestes lanzamentos, un 80,5%, e esta fiabilidade outórgalle moitas opcións de triunfo, sobre todo en finais igualados. Un exemplo claro, Obradoiro e Breogán levan lanzados practicamente o mesmo número de lanzamentos desde os tiros libres (360 e 361 respectivamente) pero os de Santiago anotaron 290 por 254 os lucenses, é dicir, unha diferenza de 36 puntos.
Este máis que notable porcentaxe en triplos e en tiros libres -e ademais cunha boa porcentaxe nos tiros de dous puntos- explica en gran medida e limita a importancia de que o conxunto obradoirista sexa o peor equipo da competición en rebotes ofensivos.
Para o encontro do sábado, o Obradoiro mantén a dúbida da participación, por mor dunha lesión muscular, da á-pivote belga Maxime De Zeeuw.
