LUGO. Lugo prepárase para acoller o XV clínic "Lugo é basket", que se celebrará o 15 de setembro, e o V torneo "Lugo é basket" que terá lugar o día 23 de setembro.
Ambos os eventos foron presentados onte e contaron coa presenza do deputado provincial de deportes Pablo Rivera, o concelleiro de Deportes e Medio Rural, Miguel Fernández; o xefe territorial da Xunta de Galicia, Manuel Otero; o vicepresidente do Durán Maquinaria Ensino, Enrique Alonso; o director deportivo do CB Breogán, Quique Fraga; e o director deportivo da Asociación Xuvenil Sacro Corazón, Rubén Engroba.
O clínic "Lugo é basket" contará coa presenza da técnico Xota Cuspinera, que será a peza central do evento. Cuspinera é un técnico cunha dilatada experiencia na máxima categoría do baloncesto. Exerceu como seleccionador nacional sub 16, foi axudante de conxuntos como Baskonia ou Real Madrid, e na súa etapa máis recente adestrou a equipos de ACB como Fuenlabrada e Zaragoza.
O clínic estará dividido en catro conferencias, dúas en horario de mañá e dous de tarde nas que se repasarán conceptos tan amplos como o baloncesto de formación, o salto ao deporte de elite, ou os labores de "scouting". Ademais, os asistentes ao evento poderán gozar da interacción con Xota Cuspineda nos actos posteriores ás conferencias.
Doutra banda, o quinto torneo "Lugo é basket" atraerá á gran afección do baloncesto da cidade a gozar dos dous equipos referencia da provincia como son o Ensino e o Breogán.
Este torneo servirá para ver, por primeira vez esta pretemporada, o estado do Durán Maquinaria Ensino, que se enfrontará ás Patacas Hijolusa León (18.00 horas). Tamén será unha oportunidade de asistir a un preludio do que veremos durante a tempada no encontro que enfrontará ao CB Breogán ante o Montakit Fuenlabrada.
Este encontro entre dous equipos de ACB comezará ás 11.15 horas do día 23 de setembro nun partido que será moi similar a un partido oficial, xa que terá arbitraxe oficial, "speaker", e espérase unha asistencia e animación propio dun encontro de tempada.
Ao termo do partido, os asistentes poderán gozar de música a cargo da duendeneta, inchables para os máis pequenos, e outras actividades que pretenden achegar á afección. As entradas para o partido do Breogán terán un prezo de entre seis e doce euros, e para o do Durán Maquinaria Ensino serán de tres euros.
