martes. 12.11.2019 |
El tiempo
martes. 12.11.2019
El tiempo

A afección meréceo

Gerun e Löfberg intentan evitar unha canastra de Huskic. MEDIA CENTER ACB
Gerun e Löfberg intentan evitar unha canastra de Huskic. MEDIA CENTER ACB

O Breogán buscará un último triunfo que atenúe algo a amargura do descenso á súa sempre fiel inchada. O San Pablo chegará ao Pazo con opcións de acceder aos torneos continentais

O Cafés Candelas Breogán despídese da tempada, e tamén da liga Endesa, co partido que o vindeiro domingo (12.30 horas) no Pazo dos Deportes de Lugo enfrontarao co San Pablo Burgos.

O partido é totalmente intranscendente para o conxunto lucense, que finalizará a competición na última praza. Para o seu rival, unha vitoria serviríalle para asegurarse a undécima posición da táboa, o que lle podería abrir as portas para disputar a próxima tempada unha competición europea. No seu segundo ano na liga Endesa, o conxunto burgalés xa mellorou o realizado no seu debut ao conseguir unha vitoria máis. De todos os xeitos, o máis significativo para o club castelán é que esta tempada practicamente non tivo ningún tipo de apuro en canto a mirar cara á permanencia.

Cunha afección plenamente entregada -non adoitan baixar dos 9.000 espectadores no Coliséum; ten unha capacidade de 9.352 localidades-, os dirixentes do San Pablo Burgos entenden que chegou o momento de ofrecer algo máis aos seus seguidores. O presidente da entidade burgalesa manifestou hai uns días o seu desexo de participar en Europa aínda cos riscos que iso representa pero entende que "era peor momento subir a ACB con dous anos de historia". Desta opinión é tamén o director deportivo, Albano Martínez, que considera que é necesario "ser valentes e asumir riscos". O Concello de Burgos, así o manifestaron os principais partidos, está disposto a aumentar a axuda ao club, e máis se xoga en competición europea, que esta tempada superou os 600.000 euros.

É dicir, para o San Pablo aínda queda unha motivación para afrontar o último encontro da tempada. O Breogán, pola súa banda, intentará ofrecer a mellor imaxe posible para pechar unha tempada que, a nivel deportivo, estivo cargada de inconvintes e erros. Do persoal actual só Sergi Quintela ten contrato en vigor para a próxima tempada. Isto non quere dicir que no novo proxecto non vaia ter cabida algún xogador máis, pero o que é evidente é que a maioría dos xogadores non volverán vestir a camiseta celeste.

CEN PARTIDOS DE BROWN. Noutro contexto habería lugar para unha celebración, xa que o estadounidense Alec Brown xogará ante o San Pablo o seu partido número cen na liga Endesa. O pivote chegou ao baloncesto español para xogar no Obradoiro na tempada 2015-16, co que xogou 29 encontros. Na campaña seguinte volveu a Estados Unidos aínda que o Estudantes recuperouno para disputar os últimos seis encontros do curso 2016-17 e renovarlle o seu contrato para a tempada seguinte.

Co Breogán, Brown disputou 30 encontros cunha media de 24 minutos por partido para anotar 10,6 puntos e captura 5,7 rebotes por encontro. Tras o xogador do Real Madrid Walter Tavares, o xogador do Breogán é o segundo mellor taponador, con 1,57 por encontro. A súa porcentaxe no tiro é do 41% en tiros triplos e do 52% en tiros de dous puntos.

No Burgos non poderá xogar Dominique Sutton, sancionado con catro partidos por agresión ante o Zaragoza.

A afección meréceo
Comentarios