O Real Madrid conseguiu este sábado o título de campión de España de baloncesto masculino na categoría infantil. O conxunto branco impúxose, no Pazo dos Deportes de Lugo, tras unha prórroga ao Gran Canaria grazas a unha canastra tripla anotada por Shona Mutambirwa sobre a bucina. O campionato celebrouse entre Lugo e Sarria durante a última semana.
O Real Madrid sufriu ante un Gran Canaria que loitou de forma incrible e que forzou a prórroga dun choque igualado en todo momento. De feito, os parciais dos cuartos do encontro, incluído o da prórroga, demóstrano.
A afección lucense gozou dunha final de calidade, bo xogo e emoción con dous equipos que contan con algúns dos proxectos do baloncesto español.
O Gran Canaria viaxara ata Lugo como terceiro clasificado das illas, e vaise como subcampión de España e tras deixar algúns dos mellores momentos que se viron no torneo lucense, a pesar de irse sen o ouro.
O Real Madrid, pola súa banda, soubo xogar ante equipos de menos nivel, pero elevou o seu baloncesto ante equipos tan perigosos como o Joventut nas semifinais —os brancos tiraron de calidade e tiro exterior—; e, finalmente, soubo xogar ante un Gran Canaria que dominou o marcador durante moitos minutos e que loitou de ti a ti no apartado físico.
O partido tivo o seu momento cume nos últimos minutos do tempo regulamentario. A 4.19 minutos para o final, o Real Madrid abriu unha pequena brecha (69-60) que parecía definitiva. Craso erro. Ante o perigo latente da derrota, o Gran Canaria xogou como un auténtico campión e igualou o choque cun parcial de 0-9 (69-69), que obrigaba aos dous equipos a xogarse o todo polo todo na prórroga.
Xa no tempo extra, os canarios controlaron o marcador cun gran Tchanda, pero no último ataque o Real Madrid tivo varias opcións desde o tiro libre, dous triplos e dúas canastras de dúas. Ningunha delas, excepto a última de Mutambirwa (triplo), chegou a bo porto sobre a bucina ao Real Madrid, que conseguiu a vitoria e un novo triplete (júnior, cadete e infantil) no 2019.
