martes. 22.10.2019 |
El tiempo
martes. 22.10.2019
El tiempo

63-58. Un Ensino que foi de menos a máis

O Ensino celebra a Copa Galicia. EP
O Ensino celebra a Copa Galicia. EP
O conxunto lucense revalida o título da Copa Galicia ao imporse na final ao Celta

O Durán Maquinaria Ensino revalida o título de campión da Copa Galicia de baloncesto feminino ao imporse por 63-58 ao Celta Baloncesto nun encontro que se disputou en Narón.

O conxunto que adestra Juan Nécega sobrepúxose a unha mala primeira metade e despois do descanso puido remontar e mellorar as súas sensacións para levar finalmente a vitoria ante un conxunto que non o puxo fácil e que demostrou que pode ser un dos equipos máis potentes na tempada que está a piques de comezar na liga Feminina 2.

A pesar de ser un conxunto de inferior categoría, o Ensino sabía que non ía ser un encontro sinxelo e así foi o guión. O primeiro cuarto do choque mostrou a dous conxuntos que tiveron problemas para anotar, sen moita fluidez en ataque e cun xogo demasiado precipitado.

Xa no segundo cuarto, o equipo lucense non estivo nada ben e encaixou un parcial de 14-22 porque non terminaba de estar acertado ante o aro rival, mentres que o Celta si que conseguía anotar e íase ao descanso cunha inquietante vantaxe de nove puntos (25-34).

O Ensino, como ocorreu durante toda a pretempada, tivo que sobreporse á ausencia de varias xogadoras que seguen lesionadas e debeu botar man dalgunhas mozas para intentar rotar algo máis.

O regreso dos vestiarios mostrou a mellor cara para o conxunto que adestra Juan Nécega, que espabilou realmente no seu xogo, apertou en defensa, mellorou nas perdas e iso permitiulle remontar o encontro e afrontar os últimos dez minutos cunha mínima renda ao seu favor (48-46).

Quedaba todo por decidir e o Ensino tiña todas as opcións de revalidar o triunfo. Aí, as lucenses souberon ter os nervios ben tépedos e mostráronse certeiras nos momentos decisivos, ante un rival que non se foi do encontro, pero que non foi capaz de verse por diante no marcador.

Ao final, as lucenses pechan cun bo broche a pretempada e conseguen o obxectivo de repetir como campioas da Copa Galicia e facer valer o feito de ser o único conxunto galego que militará a próxima tempada na máxima categoría do baloncesto nacional.

FICHA TÉCNICA
Durán Maquinaria Ensino: Stanacev (6), Laura Aliaga (8), Britany Miller (8), Nyingifa (15), Bea Sánchez (15) —quinteto inicial—, Ainhoa López (6), Breedlove (5), Alba Ruano e Maite Franco.

Celta Baloncesto: Celia García (3), Helmi Tulonen (9), Anne Senosian (6), Elo Efederioka (8), Ainhoa Lacorzana (10) —quinteto inicial—, María Neira (2), Comesaña (2), Fontela (2), Barneda (6) e Richardson (10).

Árbitros: Paula Lema, Adrián Iglesias e Laura Piñeiro. Sen eliminados.

Incidencias: Partido final da Copa Galicia de baloncesto feminino disputado no pavillón da Gándara de Narón ante a presenza de bastantes afeccionados.

63-58. Un Ensino que foi de menos a máis
Comentarios