O Lugo, que anotara só un gol nos dous primeiros amigables da pretemporada, anotou tres este mércores no terceiro, ante o Compostela, da Segunda RFEF.
O equipo de LaLiga SmartBank saíu de inicio con Varo; Torrado, Alende, Xavi Torres, Matías, Luís Castro; Borja Domínguez, Hugo Rama; Chris Ramos, Leandro e Manu Barreiro.
Foi o dianteiro santiagués o que adiantou aos lucenses no primeiro minuto de xogo tras un roubo en campo propio.
O Compostela, que xogaba no seu campo, o Vero Boquete de San Lázaro, tivo opcións de empatar pero non o logrou antes do descanso.
Na segunda metade, o Lugo formou con Fran Vieites, Campabadal, Alberto Rodríguez, Carlos Pita, Ros, Lebedenko; Seoane, Juanpe; Gerard Valentín, Mayoral e Carrillo.
Edu Campabadal, que anotara o único gol do Lugo na pretemporada, ante a SD Ponferradina (0-1), ampliou a renda aos 66 minutos ao aproveitar un balón solto na área.
Juanpe pechou a goleada aos 73 minutos ao conectar de cabeza un centro de Gerard Valentín.