Contundente derrota do Arenal Emevé de mans do Sant Cugat no Municipal de Lugo. Caeron unhas xogadoras lucenses que buscaban unha vitoria que as achegase máis á permanencia na Liga Iberdrola feminina de voleibol. Así as cousas, deberán pelexar nas tres xornadas que faltan para que conclúa a fase regular da liga para lograr o obxectivo.
Pronto se viu sorprendido o Emevé ante un Sant Cugat máis intenso (5-10), o que obrigou ao banco local a pedir tempo morto. Seguiu sen gustarlle o que vía a José Valle, que con 13-18 víase obrigado a parar o partido por segunda vez. Nin a enérxica charla do preparador lucense logrou espertar ás súas, que vían o set perdido (16-23), pero de súpeto soou o espertador. Un incrible parcial de 7-0 puxo as lucenses en disposición de loitar pola manga. Pero a sorte non estivo do seu lado e o Emevé viu como se lle escapaba o primeiro punto nunha bóla inverosímil: 25-27.
Morrer na beira foi un xerro de auga fría para as lucenses, que arrincaron o segundo parcial xeadas. Tras un 4-9 de saída, José Valle probouno todo para cambiar a deriva, pero as súas foron incapaces de deixar de sufrir na recepción e ante a liña de bloqueo catalá: 12-25.
Como un boxeador contra as cordas os locais non lograban escapar da sensación de noqueo. Sempre a remolque no terceiro, souberon manterse en pé para apurar as súas últimas opcións de vida ata o final. Pero a tarde non estaba para remontadas heroicas no Municipal e o Sant Cugat, que xeou o recinto lucense, pechou co 22-25 o 0-3 definitivo.
Sant Cugat: Aina Berbel, Raquel Brun, Andrea Bové, Camila Maldonado, Anna Newsome, Itziar López —equipo inicial—, Marta García (líbero) e Alba Cardona.
Parciales: 25-27, en 27 minutos. 12-25, en 18 minutos. 22-25, en 27 minutos.
Árbitros: Soria Ibazeta e Folgar Fraga.
