Faltoulle o apromo suficiente ao Emevé para lograr o seu segundo triunfo da tempada. Nun partido igualado, que se decidiu nas distancias curtas, o cadro lucense acabou por dobrar o xeonllo ante un rival directo pola permanencia, un Cajasol Juvasa que era último na Superliga 1 e que aínda non puntuara.
O primeiro set foi sintomático do que se viu durante o encontro. Sempre con pequenas vantaxes, co electrónico reflectindo cambios constantes de liderado, con 22-22 no tenteador o cadro visitante deu un tirón para gañar.
O Emevé empezou ben o segundo parcial, pero con 7-8 o Juvasa tomou a dianteira para non cedela ata o 21-25 final. O terceiro set permitiu tomar aire ao conxunto lucense, que soubo facerse forte desde o 8-7 a favor ata o 25-20 co que se mantivo con vida.
Pero o cuarto parcial resultou definitivo para o Emevé, xa que se saldou cun 22-25 que mandou ao traste as opcións de gañar.