O Lugo e a Ponferradina empataron o derbi dos Ancares (1-1), co que pecharon este venres a pretemporada no Anxo Carro a unha semana de que comece o campionato de Segunda División, no que volverán coincidir tras o ascenso dos bercianos á categoría de prata.
O equipo que adestra Jon Pérez Birlo iniciou coas ideas máis claras o último test do verán e froito da súa insistencia, e tamén dun erro defensivo dos galegos, adiantáronse cun gol de Pablo Valcarce, que lle colleu as costas a Calderón e bateu a Varo. Foron os mellores minutos do equipo leonés e o propio Valcarce estivo a piques de anotar o segundo despois dun fallo de Varo cos pés que o porteiro corrixiu cunha boa parada para sacar o balón a córner.
O Lugo repúxose deses momentos delicados e restableceu a igualada a catro minutos do descanso cun cabezazo de Manu Barreiro. Xa na segunda metade, o equipo que adestra Eloy Jiménez acariñou o segundo tanto con outro remate de cabeza de Cristian Herrera e un disparo da frontal de Manu Barreiro. A Ponferradina mellorou cos cambios de Birlo, pero o partido perdeu ritmo e o resultado non se moveu.
JIMÉNEZ PIDE REFORZOS "QUE COMPITAN DESDE XA"
Tras o partido, Eloy Jiménez recoñeceu o cansazo do equipo no tramo final, e insistiu na necesidade de pechar canto antes novas fichaxes. "Ao final, tiñamos doce xogadores de campo e o mozos do filial e enfronte tiñamos un bo equipo. Houbo cousas positivas e negativas e agora hai que esperar que se poida incorporar xente", comentou.
O adestrador do conxunto branquivermello reiterou que a falta de frescura pode explicar eses erros que se viron e tamén a falta de acerto en accións de ataque. "Quizá nos faltou frescura e dinamismo cando saïamos da presión, esta semana foi de bastante carga e faltounos algo de velocidade, sobre todo no campo contrario. Pero tamén tivemos as nosas opcións, as nosas oportunidades. O gol deles vén porque se meten entre os centrais e chegou un desaxuste. Agora o que importa é preparar ao equipo para chegar á liga", manifestou.
Eloy Jiménez insistiu en que aínda hai cousas que corrixir, como é lóxico dunha pretemporada e lanzou de novo a necesidade de contar con máis xogadores. "Aínda non acabas de estar ben fisicamennte, co que che falta frescura na finalización e o remate, hai loxicamente cousas que corrixir, agora mesmo o que toca é que cheguen os xogadores que faltan porque agora mesmo estamos collidos con pinzas", expresou. O adestrador do Lugo, ao referirse ás fichaxes, deixou claro que quere traer xogadores que cheguen preparados para competir.
"Iriome veremos como está o luns, e Campabadal e Teté Morente xa estarán tamén. É evidente que nos faltaron xogadores, pero necesitamos xogadores para poder competir, non traer xogadores para poñernos en forma dentro dun mes e medio", á vez que remitiu ao director deportivo para máis información sobre as incorporacións. "Dese tema teredes que preguntarlle a Manolo Mandiá, que é quen o leva. A min dílleme cando practicamente está feito, non se quen pode chegar", concluíu.
MANU BARREIRO CRE QUE O EQUIPO ESTÁ "BEN" FISICAMENTE
O autor do gol onte, Manu Barreiro, destacou que o equipo tardou en arrincar #ante a Ponferradina. " Custounos un pouco entrar non partido na primeira parte porque eles tiveron moita superioridade por dentro. A raíz do gol estivemos máis tranquilos, tivemos máis presión de balón e na segunda metade estivemos ben. Notouse que levabamos unha semana con moita carga de traballo", dixo Barreiro. "Fisicamente chegamos ben ao inicio de Liga. Vos que estamos, estamos moi comprometidos, e vos que veñan agardamos que veñan con esa idea", destacou o punta compostelán.
Ponferradina: Manu García; Son, Ríos Reina, Sielva, Nacho Gil, Yac, Trigueros, Fullana, Isi, Pablo Valcarce e Kaxe. Tamén xogaron Gazzaniga (p.s.), Yuri, Asier Benito, Luis Valcarce, Zabaco, Dani Pichín, Óscar e Bolaños.
Goles: 0-1, min.22: Pablo Valcarce. 1-1, min.41: Manu Barreiro.
Árbitro: Areces Franco, do Comité Asturiano. Mostrou amarela a Seoane (min.29), do Lugo.
Incidencias: Partido amigable de presentación do CD Lugo no Ángel Carro.