Unha oportunidade para ver ao mellor Tarence Kinsey. Unha nova opción de que o escolta de Tampa manteña o seu nivel de implicación, de profesionalidade e de xogo que mostrou en tantos equipos na NBA ou en Europa para conducir ao Breogán a un límite que se atopa aínda por determinar. O xogador de Florida revelou que chegar ao club lucense foi un "éxito" e que significa un "reto" na súa carreira.
"Asinar co Breogán é unha oportunidade de xogar na liga ACB, que é unha das mellores ligas de baloncesto. Estar neste equipo é un éxito, un gran paso e un reto para min. Estas son as oportunidades das que me gusta formar parte", valorou Kinsey.
O escolta atópase "preparado" para "dar o 100% en cada equipo no que xogo, non importa se xogo un minuto ou cen minutos. Sempre tratarei de dar o máximo".
"Todos os días verase a miña mellor versión. Cada día que salga á pista darei o mellor de min. Nalgúns partidos non só as estatísticas poden dicir se xogaches ben ou non. Este xogo vai de facer sempre un grande esforzo. Somos un grupo de xogadores que tratan de probarse a si mesmos nesta Liga e todos tratamos, na medida do posible, de contribuír na nosa faceta", engadiu.
O exxogador de Memphis ou Cleveland indicou que aínda queda por mellorar o seu nivel de comunicación, algo no que está a traballar. "Cheguei coa pretempada empezada e creo que é un gran reto para min o feito de ser o único xogador do persoal que non fala español e as instrucións son en español. Non é fácil cando apenas sabes os números. Teño que usar os meus dedos durante o partido ás veces só para dar as xogadas. Pero creo que en canto o tempo vaia pasando actuarei e reaccionarei máis e mellor".
Sobre a súa tarefa na cancha, Kinsey asegurou que o adestrador do Breogán, Natxo Lezkano, "non nos está dando detalles específicos sobre que é o que debe facer cada xogador. O que nos di é que sexamos profesionais para aproveitar as nosas oportunidades e gañar. A todo o equipo pídenos que nos esforcemos en aprender as xogadas para preparar ben os partidos e afrontar a dureza dos partidos".
O estadounidense mostrouse sorprendido coa afección do Breogán. "Para ser sincero, non sabía moito de Lugo cando cheguei, pero os compañeiros dixéronme que os afeccionados sempre ofrecían un grande apoio ao equipo. Tanto no último partido como no primeiro, que foi cancelado, mostraron un grande apoio. No encontro ante o Estudiantes, despois do partido, volvemos saír e estivemos na pista cos nenos, o que é moi bo. Non moitos clubs permiten iso".
Para Kinsey o Breogán non ten límite en canto a rendemento. "Este equipo traballa extremadamente duro. Os directivos e os adestradores preparan cada partido e cada adestramento moi duro. Cando fas as cousas dese xeito o ceo é o límite. Poderemos gañar moitos partidos se nos mantemos así".
Para rematar, o escolta norteamericano asegurou que o triunfo ante o Estudiantes reforzará ao equipo ante o Burgos. "Todo partido que xoguemos é importante para o seguinte, especialmente se gañamos. Se perdes podes aprender do que fallaches. Ás veces necesitas unha pequena vitoria para ir na dirección correcta e motivarte máis", opinou.
