Zinedine Zidane, técnico do Real Madrid, eloxiou a Cristianooo Ronaldo na véspera da final da Liga de Campións en Cardiff e asegurou que se coincidisen como xogadores en activo "a estrela sería" o portugués porque, destacou, o máis importante é "parar e meter". "Se eu coincidise con Cristiano, el sería a gran estrela porque mete goles e iso é o máis importante no fútbol: parar e meter", afirmou.
"O medio campo é un papel importante tamén, todas as posicións o son, pero o máis difícil é parar un gol, porque podes facer un bo partido 80 minutos pero se che meten gol ao final diranche de todo, e o que esperas do teu nove é que marque gol e non é fácil. Eu xogaba ben ao fútbol, pero non metía moitos goles, asistencias si daba. Metín goles importantes, pero non moitos", engadiu entre risas.
Zidane destacou de Cristiano os valores que ten como persoa e a motivación como deportista que o converte en líder natural: "Ao final Cristiano é unha boa persoa porque se preocupa dos demais, pero o que destaco é o que fai profesionalmente".
"Cristiano é unha boa persoa porque se preocupa dos demais, pero o que destaco é o que fai profesionalmente"
"Todo o mundo ve que sempre quere máis, xogando nun adestramento quere gañar e isto achega ao equipo sempre a mentalidade de gañar. Ten unha cousa dentro que o converte en líder nato para os demais no campo", manifestou.
Doutra banda, o técnico do Real Madrid non desvelou quen será o elixido, entre o galés Gareth Bale e Isco Alarcón, para xogar como titular ante o Juventus na final da Liga de Campións, e asegurou que ambos están listos "animicamente e fisicamente". A mensaxe de Bale no día de portas abertas aos medios en Madrid, ao confesar que non está ao cento por cento, non ten continuidade en Zidane, que publicamente asegura que o galés está en perfectas condicións para xogar a final e optou por manter a incerteza na súa decisión.
"Non vou dicir quen vai xogar", recoñeceu. "Ao final son dous xogadores que poden tamén xogar xuntos e pode pasar de todo. O importante é que cando vexo ao persoal o bo é que estean todos listos para xogar unha final", engadiu.
O técnico madridista confirmou que "non só animicamente están listos" para a gran cita de Cardiff, "sobre todo fisicamente", e incidiu en que Bale está en perfectas condicións para reaparecer tras a súa última lesión de sóleo. "O que máis me interesa hoxe en día é o físico, chegar a final de tempada fisicamente todos a un nivel moi alto como están", resaltou.
