O Comité Executivo da Uefa, reunido este luns en Montreux (Suíza), acordou seguir adiante co novo formato da liga de Campións que entrará en vigor na campaña 2024-25 pese ao anuncio de creación dunha Superliga europea por parte de doce dos clubs poderosos do continente.
Independentemente da pretensión destas entidades de strong <>crear unha competición case pechada, dentro de tres anos o principal torneo europeo contará con 36 equipos no canto dos 32 da actualidade.
Estes repartiranse en catro grupos de nove equipos que disputarán outras tantas liguiñas. Os oito mellores accederán directamente a oitavos, os situados entre o 25 e o 36 quedarán eliminados e os que acaben entre o noveno e o 24 posto disputarán unha eliminatoria a dobre partido para completar os oitavos.
Despois, a liga de Campións continuará co formato actual de eliminatorias a dobre partido.
O gañador ou o subcampión xogarán un total de 17 encontros en lugar dos 13 actuais, ou incluso 19 se teñen que superar o play off.
As catro grandes ligas (Inglaterra, España, Alemaña e Italia) manterán catro clasificados de oficio. Francia, quinta actualmente, terá tres aseguradas e o gañador da liga Europa da tempada anterior tamén, así como un gañador de liga doméstica, co que se ampliará de de catro a cinco o número de clubs que se clasifican a través da chamada "senda dos campións".
As dúas últimas prazas serán para os clubs co maior coeficiente dos últimos cinco anos que non se clasificaron para a fase de grupos da liga de Campións, pero si para a fase de clasificación da liga de Campións, a liga Europa ou Conference League.
Tamén se cambiará de formato de forma parecida na liga Europa (8 partidos na fase de liga) e á nova Conference League (6 partidos na fase de liga).
"Suxeito a novas discusións e acordos, estas dúas competicións tamén poderán ampliarse a un total de 36 equipos cada unha na fase de liga", precisa a UEFA.
A clasificación para a liga de Campións seguirá sendo aberta e gañarase a través da actuación dun equipo nas competicións nacionais.
A UEFA apunta que "todos os partidos anteriores á final seguirán xogándose entre semana, recoñecendo a importancia do calendario nacional de partidos en toda Europa".
O máximo organismo continental explica nun comunicado que estas reformas "chegan tras unha ampla consulta a toda a familia do fútbol e recibiron o respaldo unánime do Consello da ECA e do Comité de Competicións de Clubs da Uefa (formado por unha maioría de representantes de clubs) o pasado venres".
"Os cambios realizados están deseñados para asegurar o futuro positivo do fútbol europeo a todos os niveis e satisfacer as necesidades cambiantes de todas as súas partes interesadas. Confirmando inequivocamente o compromiso conxunto co principio da competición aberta e o mérito deportivo en todo o continente, o propósito común foi tamén o de soster as ligas nacionais", sostén.
O seu presidente, o esloveno Aleksander Ceferin, precisa que "este novo formato apoia o status e o futuro dos torneos domésticos tamén en toda Europa. Mantén o principio de que o rendemento doméstico debe ser a clave para a clasificación e reconfirma os principios de solidariedade a través do xogo e da competición aberta".
"Este formato evolucionado seguirá mantendo vivo o soño de calquera equipo de Europa de participar na liga de Campións da Uefa grazas aos resultados obtidos no terreo de xogo e permitirá a viabilidade, a prosperidade e o crecemento a longo prazo de todos os integrantes do fútbol europeo, non só dun pequeno cártel autoseleccionado", apunta.
"O fútbol é un tesouro social e cultural, enriquecido con valores, tradicións e emocións compartidas en todo o noso continente. Como órgano de goberno e administrador responsable do xogo europeo, o papel da Uefa é salvagardar este legado á vez que lidera o desenvolvemento futuro positivo do fútbol en Europa para as federacións nacionais, as ligas, os clubs, os xogadores e os afeccionados a todos os niveis", asevera.
Antes de que finalice o ano, aclara a Uefa, decidirá cuestións como o reequilibrio da lista de acceso, as datas dos partidos, o sistema de distribución, o formato das finais, os coeficientes e a distribución financeira, e aínda poderían facerse posibles axustes ao formato aprobado hoxe se fose necesario.
Ademais, o organismo continental "reafirmará o seu forte compromiso financeiro co conxunto do fútbol europeo e iniciará os pasos necesarios para garantir unha maior solidariedade financeira a un espectro máis amplo de clubs que non participan nas competicións de clubs da Uefa. Isto reforzará a sólida base sobre a que se constrúe o xogo en Europa".
