O presidente da Uefa, o esloveno Aleksander Ceferin, confirmou este luns que a liga de Campións terá videoarbitraxe (VAR) esta tempada a partir de febreiro. O dirixente confirmou en Dublín, tras unha reunión do Comité Executivo da Uefa, que o VAR comezará a aplicarse a partir das eliminatorias de oitavos de final da Champions, que comezarán o próximo febreiro, despois do parón invernal.
"Se o podemos facer antes, para que esperar", declarou Ceferin, en referencia ás melloras experimentadas nesta tecnoloxía e ao traballo de "preparación" efectuado cos árbitros.
Despois da súa introdución na máxima competición europea de clubs, o VAR tamén estará presente na próxima final da liga Europa, na Final a Catro da liga das Nacións, que se disputará en xuño de 2019 en Portugal, e na Eurocopa sub 21 deste verán.
"Estamos listos para usar o VAR, antes do que tiñamos previsto, e estamos convencidos de que será beneficioso para todas as nosas competicións, pois ofrecerá unha axuda valiosa para os árbitros e reducirá as decisións incorrectas", dixo aos medios Ceferin.
En principio, a Uefa decidiu o pasado setembro que o VAR só chegaría ás eliminatorias da liga de Campións na tempada 2019/20, pero a presión exercida polos erros cometidos na fase de grupos este ano contribuíu tamén ao seu adianto.
O mandatario tamén confirmou este luns que a Eurocopa feminina de 2021 celebrarase en Inglaterra no mes de xullo, mentres que a masculina sub 21 organizarana conxuntamente Hungría e Eslovenia en xuño de 2021.