Os organizadores do Tour de Francia vetaron a participación do británico Chris Froome na edición deste ano, que comeza o 7 de xullo, polo procedemento que ten aberto por dopaxe, segundo publicou este domingo o diario Le Monde. O rotativo apuntou que Amaury Sport Organisation (Aso), propietario do Tour, escribiu ao equipo Sky para que non inclúa ao ciclista.
Aínda que Froome podería correr ata que non se resolva o seu caso positivo por salbutamol durante a pasada Volta a España, o Tour quere evitar que, como no recente Xiro de Italia, unha eventual vitoria do mesmo poida quedar suxeita a revisión en canto se peche a investigación.
A carreira apóiase na normativa da Unión Ciclista Internacional (UCI) que concede a facultade de rexeitar a participación ou excluír a un equipo ou a un dos seus membros se a súa presenza pode danar a imaxe ou a reputación do ASO ou da proba. Le Monde apuntou que o Sky recorreu a decisión ante a sala arbitral do Comité Nacional Olímpico e Deportivo (CNOSF), onde a audiencia terá lugar este martes ás 9 CET e ao día seguinte, 4 de xullo, coñecerase a súa decisión.
Aínda que ese ditame podería ser apelado ante o Tribunal de Arbitraxe Deportiva (TAS), o diario ve pouco probable que este poida pronunciarse antes do inicio do Tour, que partirá o sábado de Noirmoutier-en-l'Ile, na rexión francesa de Países do Loira (oeste).
Se se presenta ou non á audiencia do martes, Froome, gañador do Tour en 2013, 2015, 2016 e 2017, deberá estar asistido por un avogado francés, porque esta desenvolverase nese idioma, engadiu o diario. Le Monde destacou que de momento o Sky é o único equipo estranxeiro que aínda non comunicou os seus integrantes para esta edición.
Este xoves, o corredor británico reiterou nunha entrevista en Sky Sports que, aínda que comprende a importancia do caso no deporte, cre que ten dereito a competir e insiste en que non fixo nada malo. "Para min sería moi difícil non correr, sabendo que non fixen nada ilegal" avanzou nesa cadea.
Froome debe demostrar aínda a presenza do dobre da cantidade permitida de salbutamol no seu organismo tras a décimo oitava etapa da Volta. En caso de sanción, podería perder calquera triunfo desde a data da rolda española.
