Javier Tebas: "Piqué equivocouse; sobraba"

O presidente de LaLiga, Javier Tebas, opinou que o futbolista do Barcelona Gerard Piqué "equivocouse" ao dicir o martes, tras o amigable entre Francia e España en París, que non lle gustan os "valores" do Real Madrid nin "o que transmite como club".

"Considero que se equivocou, non vou valorar se é grave ou non", asegurou Tebas ao ser preguntado polas manifestacións de Piqué tras concluír a Asemblea Xeral Extraordinaria de LaLiga.

O futbolista do Barcelona dixo: "Non me gusta ver no palco as personalidades que hai e como moven os fíos. A persoa que imputou a Messi e Neymar e ten un trato diferente con Cristián está no palco. Non me gusta o que transmite como club".

Para Tebas o central do Barcelona e a selección española equivocouse con esas declaracións, que xeran "crispación" e non son "correctas".

"Estou convencido e díxeno en varias ocasións. Espero que o Supremo absolva a Messi, creo que non cometeu delito nese momento, igual que considero que Cristiano Ronaldo tampouco. Esperemos que o Supremo absolva a Messi. A declaración sobraba agora e creo que se equivocou", engadiu Javier Tebas.