Suecia e Rusia buscan dar a sorpresa ante Inglaterra e Croacia

Suecia, subcampioa no seu país en 1958, e Inglaterra, campioa mundial en 1966, mediranse o sábado nos cuartos de final do Mundial de fútbol de Rusia 2018 en Samara, nun choque no que ambas buscan o carreiro que guía ao reencontro co seu mellor pasado.

Ambas as seleccións chegan ao cruzamento nun estado de optimismo xeneralizado e cunha sensación de que se atopan ante unha oportunidade única: a de plantarse nunha semifinal dun Mundial, algo os suecos -que xogaron catro- non conseguen desde hai 24 anos (no de Estados Unidos'94) e os ingleses -presentes en dous- desde hai 28, no de Italia'90.

Aínda que a priori o potencial dos ingleses é superior ao do conxunto sueco, tanto o seleccionador Gareth Southgate como os seus xogadores se expresaron con precaución ante un equipo do que destacan a súa experiencia e a súa solidez defensiva.

No outro partido do sábado, os camiños de Rusia e Croacia cruzaranse en Sochi. Rusia afronta contra Croacia o partido máis importante da súa recente historia, xa que en caso de vitoria igualaría o seu maior logro nuns Mundiais: as semifinais de Inglaterra 1966.

Entón baixo os paus estaba Lev Yashin e agora Ígor Akinféev, o heroe dos oitavos de final contra España, xa que detivo dous lanzamentos na quenda de penaltis.

Cunha nova e talentosa xeración, Croacia espera emparellarse co listón fixado no Mundial de Francia'98 polo inesquecible equipo de Sucker, Prosinecki, Boban e compañía, que só caeu en semifinais a expensas do anfitrión.