Pole para Rosberg con Sainz 10º e Alonso 12º

O piloto alemán Nico Rosberg (Mercedes) foi o máis rápido na última sesión de clasificación do Gran Premio de Xapón e suma a súa segunda 'pole position' da tempada por diante do seu compañeiro británico Lewis Hamilton, líder do Mundial, que foi segundo. Carlos Sainz Jr e Fernando Alonso sairán desde a 10ª e 12ª posición, ao verse beneficiados polas sancións a outros pilotos.

O tempo de 1:32.584 de Rosberg, obtido no arranque da última sesión (Q3) foi suficiente para levar a primeira posición da saída de mañá, debido a un accidente do piloto ruso Daniel Kvyat (Red Bull), que se golpeou contra as proteccións nun durísimo choque –sen consecuencias para el, afortunadamente– e provocou a bandeira vermella en pista a falta de menos dun minuto para o final da sesión, invalidando o último intento de todos os pilotos.

Por detrás de Rosberg e Hamilton quedaron o finlandés Valtteri Bottas (Williams) e o alemán Sebastian Vettel (Ferrari), que sairán este domingo desde a segunda fila. Quinto foi o brasileiro Felipe Massa (Williams), seguido polo finlandés Kimi Raikkonen (Ferrari). O australiano Daniel Ricciardo (Red Bull), o francés Romain Grosjean (Lotus), o mexicano Sergio Pérez (Force India) e o ruso Daniel Kvyat (Red Bull) pecharon os dez primeiros postos da formación de saída de mañá.

Por detrás dos dez primeiros, a sanción de tres postos que levou de Singapura o alemán Nico Hülkenberg (Force India) tras un choque con Massa en Marina Bay, permite ao español Carlos Sainz (Toro Rosso), o venezolano Pastor Maldonado (Lotus) e o español Fernando Alonso (McLaren) gañar unha praza na saída. O alemán de Force India será décimo cuarto. O piloto holandés de Toro Rosso Max Verstappen, que sufriu un apagamento no sistema eléctrico do seu coche ao final da Q1, terminou décimo quinto ao non poder disputar a Q2, pero sairá décimo oitavo ao recibir unha sanción de tres postos por deixar o seu monopraza "nunha posición insegura", segundo os xuíces.