Ronaldinho revela que en 2003 estivo preto de fichar polo Manchester United

O astro brasileiro Ronaldinho "Gaúcho" revelou nunha entrevista coa revista británica FourFourTwo que en 2003, antes de fichar polo Barcelona, estivo moi preto de recalar no Manchester United.

"Estiven a piques de fichar polo United. Todo ocorreu moi rápido, en 48 horas. Con todo, Sandro Rosell preguntárame moito antes de recibir esa oferta: "se son presidente do Barça, virías? E díxenlle que si", relatou Ronaldinho.

"Só faltaban detalles co United cando Rosell chamou para dicirme que ía gañar as eleccións. E eu prometinlle que xogaría no Barça. A negociación foi sinxela e rápida; díxenlle aos ingleses que elixira o Barcelona", asegurou o brasileiro.

Ronaldinho, de 35 anos, que se atopa actualmente sen equipo tras desvincularse do Fluminense, recalou no Barcelona no verán de 2003 por 30 millóns de euros, aproximadamente, procedente do París Saint-Germain.

"Foi a elección correcta. Aos brasileiros sempre nos gustou o Barça, temos historia aí. Ademais, fóra do terreo de xogo mellor alí que en calquera outro sitio de Europa. Estraño moito Barcelona. Pasei cinco tempadas marabillosas alí, un equipo ao que lle gustan os dianteiros e os xogadores con talento", declarou.

O antigo internacional eloxiou ao holandés Frank Rijkaard, técnico do Barcelona entre 2003 e 2008, quen foi "o mellor adestrador" que tivo. "O mellor que tiven? Rijkaard, sen ningunha dúbida. É un dos mellores do mundo e merece dirixir a un equipo grande. Deica pouco estará a adestrar a unha boa selección e loitando pola Copa do Mundo", afirmou.

ETAPA EN MILÁN. Ronaldinho tamén explicou que tomar a decisión de deixar o Barcelona en 2008 logo de cinco cursos "foi fácil". "Foi sinxelo, era hora de irse. Quería seguir os pasos de Rijkaard, que fora o meu adestrador e que me dixo grandes cousas sobre o Milán", dixo.

"Tiven varias opcións, pero quería xogar no Milán. Non tivo nada que ver Messi. Sempre intentei ser unha boa influencia sobre el e intentei facer nel o que Ronaldo fixo comigo", aseverou o brasileiro.

"Messi sempre foi moi tímido, pero un grandísimo futbolista. Viviamos na mesma rúa e tiña unha moi boa relación con el e coa súa familia. Incluso nese momento sabía que era mellor xogador que eu", sostivo Ronaldinho.

Cuestionado sobre os rumores que o vinculaban co conxunto inglés do Blackburn Rovers en 2011 tras saír do Milán, o "10" admitiu que falou con eles, pero que na súa mente "só quería volver a Brasil". "Falei con eles, si, pero só pensaba en volver a Brasil", respondeu Ronaldinho, que acabou fichando polo Flamengo.