O Pescados Rubén xa ten data, rival, escenario e hora para o seu primeiro encontro amigable da tempada 2020-21. O partido será ante a Palma, un dos fanfurriñeiros da Primeira División, o venres, ás 20.00 horas no pavillón Vista Alegre. Outra boa noticia para os afeccionados laranxas é que o encontro terá público, aínda que só poderán acceder ao recinto 300 persoas.
O encontro ante a Palma será o primeiro que xogará o cadro burelense desde que se enfrontou a pasada tempada ao Cartaxena no mes de marzo, correspondente á liga de Primeira División 2019-20, no último choque disputado antes do parón provocado pola epidemia do Covid-19.
O encontro servirá para ver a posta a punto que ten o conxunto laranxa logo de máis dun mes e medio de adestramentos, pero sen ningún encontro por medio. A Palma si que disputou xa varios partidos de primeiro nivel, impóndose a El Pozo Murcia e caendo ante o FC Barcelona.
Os afeccionados que poidan acudir ao recinto laranxa terán a oportunidade tamén de ver as evolucións dos catro xogadores fichados para esta tempada. Tres deles, Giasson, David Pazos e Quintela, vestirán por vez primeira a elástica burelense, mentres que Javi Rodríguez xogará o seu primeiro encontro na súa segunda etapa no club. Outra novidade é o regreso de Nito logo dunha campaña cedido no Santiago Futsal e a presenza no primeiro equipo de Bruno e Renato Rodrigues tras cumprir a súa etapa xuvenil, ademais de Jorge Quelle, que compaxinará ambos os equipos.
Este martes mesmo comezará a venda anticipada das entradas para o encontro, un prezo de 10 euros para todos aqueles que foron socios a pasada tempada e de 15 euros para os non socios. As localidades retiraranse na sede do club, por orde estrita de demanda, ata esgotar o aforamento permitido. O horario para adquirir os abonos son de 10.00 a 14.00 horas e de 16.00 a 19.00 horas, desde este martes ata o xoves, e de 10.00 a 14.00 horas o venres.
No caso de que haxa aínda entradas dispoñibles poranse á venda no propio pavillón Vista Alegre, antes do partido, ás 19.00 horas.
NOIA FS. O cadro burelense ten ademais pechados xa outros dous encontros de preparación que terán un mesmo rival, o Noia FS. O primeiro deles será no pavillón noiés Agustín Mourís, o día 22, martes, e o segundo, en Burela, na Vista Alegre, o 28, luns. Este encontro podería ser o último de preparación se o campionato comeza o día 4 de outubro como está estipulado nun inicio.
