A Real Sociedade anunciou aos seus afeccionados que cambiará gratis as camisetas oficiais que leven impreso o nome de Iñigo Martínez, o exxogador da canteira que esta semana abandonou o club tras pagar a súa cláusula de rescisión para recalar no Athletic Club.
A entidade branquiazul fixo público un comunicado titulado "Xa é historia", no que ofrece aos seareiros a posibilidade de acudir a partir de mañá pola tarde a calquera tenda da Real a entregar a camiseta co nome do central de Ondarroa e cambiala por outra coa nova publicidade de Euskaltel, en lugar da chinesa Qbao, e co nome que desexe.
O club fixo público a través das redes sociais este xesto, que está a ser moi ben acollido por unha afección que, na súa gran maioría, reaccionou á marcha de Martínez ao máximo rival con enorme indignación e tristeza, sobre todo polo momento da tempada e a delicada situación deportiva que atravesa a Real.
