O Real Madrid iniciará a defensa do título do Mundial de Clubs o 19 de decembro en Emiratos Árabes Unidos contra o gañador do encontro entre o Chivas de Guadalaxara mexicano e o vencedor da Liga de Campións de Asia, segundo o sorteo realizado este martes pola FIFA na súa sede de Zúric.
O equipo que dirixe Julen Lopetegui, clasificado directamente para semifinais, buscará o seu terceiro título consecutivo nesta competición que gañou por última vez o ano pasado ao vencer ao Gremio brasileiro (1-0) cun tanto do portugués Cristiano Ronaldo.
O primeiro encontro xogarano o Al Ain de Emiratos contra o Wellington de Nova Zelandia o 12 de decembro e o día 15 disputaranse outros dous partidos: un entre o campión de África, aínda por decidirse, e o gañador do choque anterior.
O outro enfrontará ao campión de Asia, que tamén debe resolverse, e o Guadalaxara mexicano, clasificado tras derrotar ao Toronto na liga de Campións da CONCACAF.
O vencedor deste xogará unha semifinal o día 19 contra o Real Madrid e a outra semifinal enfrontará o día anterior ao campión da CONMEBOL e gañador da Copa Libertadores co club que supere o outro enfrontamento de cuartos.
A final e o partido polo terceiro posto disputaranse o 22 de decembro.