Con garras, dentes e coitelo afrontará –son as súas palabras– Ana Peleteiro a final olímpica de triplo salto, o vindeiro domingo, tras conseguir na rolda clasificatoria a mellor marca española da historia ao aire libre: 14,62 metros.
O español será o idioma predominante na pelexa polos metais, pois xunto á galega clasificáronse a campioa do mundo, a súa compañeira de adestramentos venezolana Yulimar Rojas, que saltou 14,77 á primeira, e a colombiana Caterine Ibargüen, actual campioa olímpica, que alcanzou os 14,37 á terceira.
Peleteiro necesitou dous intentos. A plusmarquista española (14,73) e campioa de Europa en pista cuberta en Glasgow 2019, estaba "ansiosa por competir" nos seus primeiros Xogos.
Adscrita ao grupo de traballo do cubano Iván Pedroso en Guadalaxara, Peleteiro presentouse na capital nipoa logo de gañar o campionato de España cun salto de 14,61 metros, entón o seu mellor rexistro ao aire libre e décimo na lista mundial.
Peleteiro rozou a clasificación directa na primeira quenda (14,34) e conseguiuno á segunda tentativa con 14,62, a mellor marca española da historia ao aire libre.
