Os arousáns Carlos e Antón Paz manteñen as súas opcións de medalla nos Mundiais de vela que se están disputando en Clearwater (Estados Unidos) ao situarse, tras a disputa da terceira xornada, na quinta posición da clase 49er.
Pola súa banda, a pontevedresa Támara Echegoyen e a cántabra Berta Betanzos afastáronse dos postos de cabeza en FX. Aínda que as súas opcións de clasificación para a Medal Race seguen intactas, as españolas caeron da terceira á undécima posición.
Con respecto aos irmáns Paz, tan só un punto os separa da cuarta praza, que actualmente pertence aos franceses Julien D'Ortoli e Noe Delpech, e tres da terceira, na que se asentan os británicos John Pink e Stuart Bithell.
Os líderes desta clase seguen sendo os neozelandeses Peter Burling e Blair Tuke, quen contan as mangas por vitorias, e segundos son os australianos Nathan Outteridge e Blair Tuke.
"Neste momento temos que centrarnos na fase final para entrar na Medal Race", dixo Antón Paz en declaracións facilitadas pola Real Federación Española de Vela. "A partir de aí veremos cales son as nosas opcións", apuntou.
Novenos son o cántabro Diego Botín e o galego Iago López mentres que os irmáns asturianos Federico e Arturo Alonso ocupan a vixésima cuarta posición.
En Nacra 17 quedaron sen competir a menorquina Julia Rita e o vasco Iker Martínez, lesionado nun xeonllo tras a abordaxe doutra embarcación na xornada anterior. O galego Fernando Echávarri e a canaria Tara Pacheco despediron a xornada no décimo oitavo lugar.
Os irmáns Paz e Echegoyen manteñen intactas as súas opcións
Os arousáns marchan quintos na clase 49er nos Mundiais de vela, mentres que a pontevedresa e a súa compañeira Berta Betanzos caeron da terceira á undécima posición en FX
