O dianteiro arxentino Lionel Messi non renovará polo Barcelona, segundo anunciou este xoves o club catalán, que atribúe a obstáculos "económicos e estruturais" a imposibilidade de asinar un novo contrato.
"Ante esta situación, Lionel Messi non continuará ligado ao FC Barcelona. As dúas partes lamentan profundamente que finalmente non se poidan cumprir os desexos tanto do xogador como do club", conclúe a entidade azulgrana nun comunicado.
O Barça informou de que ambas as partes chegaran a un acordo e tiñan "a clara intención de asinar un contrato no día de hoxe", pero que ao final non foi posible cumprir coa normativa de LaLiga española.
A pesar de que Messi finalizou contrato co Barça o pasado 30 de xuño, todo parecía indicar que o astro arxentino asinaría un novo acordo para as dúas próximas tempadas coa chegada de Joan Laporta á presidencia.
O FC Barcelona quixo agradecer "de todo corazón" a achega do 10 ao "engrandecimiento da institución" e desexoulle "o mellor na súa vida persoal e profesional"
De feito, Laporta insistiu en que a renovación de Leo Messi ía "polo bo camiño" en todas as súas comparecencias e asegurou estar "tranquilo" respecto da súa continuidade no equipo.
O cumprimento do fair-play financeiro de LaLiga era o único obstáculo que, segundo o dirixente da entidade azulgrana, podía apartar a Messi do Camp Nou.
Con todo, o acordo anunciado este mércores por LaLiga co fondo internacional CVC para inxectar 2.700 millóns de euros na competición e os clubs parecía achandar o camiño do Barça para renovar ao crack de Rosario.
De feito, Messi aterraba o mércores na capital catalá ao finalizar das súas vacacións, e o seu pai e representante, Jorge Messi, facíao este xoves -apenas 24 horas despois- para reunirse con Laporta, nun encontro que a priori debía servir para selar a continuidade do xogador.
O presidente do FC Barcelona, Joan Laporta, comparecerá este venres en rolda de prensa para explicar os motivos da marcha de Messi
O obxectivo era anunciar a súa renovación antes de que o Barcelona disputará o Trofeo Joan Gamper ante o Juventus no Estadio Johan Cruyff, o vindeiro domingo, cando Leo Messi debía dirixirse, como capitán, aos socios, nos parlamentos.
Con todo, a negociación deu un xiro inesperado esta tarde e a operación rompeu, segundo a versión oficial do club por "obstáculos económicos e estruturais" que facían imposible a inscrición de Messi en LaLiga.
En calquera caso, o FC Barcelona quixo agradecer "de todo corazón" a achega do 10 ao "engrandecimiento da institución" e desexoulle "o mellor na súa vida persoal e profesional".
LAPORTA. O presidente do FC Barcelona, Joan Laporta, comparecerá este venres en rolda de prensa para explicar os motivos polos que dianteiro arxentino Lionel Messi non renovará polo conxunto azulgrana.
Laporta atenderá aos medios de comunicación, a partir das 11.00 horas, no Auditorio 1899 do Camp Nou, para aclarar os motivos polos que Messi finalmente non asinará un contrato por cinco tempadas que parecía estar canalizado desde hai semanas.
