O piloto español Jorge Lorenzo, tres veces campión do mundo de MotoGP, unirase ao equipo Repsol Honda a partir de 2019, cun contrato de dous anos, segundo informou este mércores Honda Racing Corporation.
O piloto mallorquino deixará Ducati ao termo da presente tempada para iniciar unha nova etapa, xunto ao seu compatriota Marc Márquez, no equipo Repsol Honda.
"A partir de 2019, Jorge Lorenzo pilotará unha Honda RC213V de fábrica xunto ás catro veces campión do mundo de MotoGP, Marc Márquez: dous grandes campións cun enorme talento e grandes expectativas, que farán máis forte ao equipo Repsol Honda e contribuirán ao desenvolvemento de HRC", anunciou Honda Racing Corporation nun comunicado. Jorge Lorenzo substituirá ao seu compatriota Dani Pedrosa no equipo Repsol Honda.
Por outra banda, o italiano Danilo Petrucci foi confirmado como o substituto de Lorenzo no equipo oficial Ducati a partir da próxima tempada.
Petrucci, ata agora na escuadra satélite Pramac, será o compañeiro de equipo de Andrea Dovizioso e resta saber quen ocupará o posto de Petrux na escuadra Pramac, que por agora só ten asinado para a próxima tempada ao tamén italiano Francesco Pecco Bagnaia.
