O Obradoiro continúa coa súa intensa pretemporada

O Rio Natura Monbus Obradoiro goza este luns da súa xornada de descanso antes do inicio da preparación da Copa Galicia Senior Masculina que disputará este fin de semana en Ourense.

O conxunto que dirixe Moncho Fernández chega de dous partidos seguidos, o sábado e o domingo, ante o Movistar Estudantes e o Herbalife Gran Canaria, o primeiro con vitoria e o segundo con derrota.

Agora o técnico deu descanso aos seus xogadores e citounos o martes no Fontes do Sar para preparar a XXX Copa Galicia Senior Masculina que disputa o venres e o sábado, se pasa á final, no pavillón Paco Paz de Ourense.

Este mesmo martes, ás 20:00 horas, mídense en Marín (Pontevedra), no pavillón da Raña, o Marín Peixegalego de LEB Prata e o Cafés Candeas Breogán de LEB Ouro por unha praza na semifinal fronte ao Obradoiro do venres ás 19:00 horas.

Ás 21:00 horas o pavillón do Pombal, na localidade pontevedresa de Cambados, acolle a cita entre o Xuventude Baloncesto (Prata) e o Leyma Básquet Coruña (Ouro), que buscan ser rivais do Club Ourense Baloncesto (Ouro) o venres logo da primeira semifinal.

Xa o sábado ás 17:30 horas a cancha ourensá acolle unha cita da selección galega de veteranos, dividida en zona norte e zona sur, e a partir das 20:00 horas a canle Televisión de Galicia retransmite a final entre os dous gañadores do venres.

Pero non se detén aquí o Obradoiro, que tamén xogará en Burgos o I Torneo Solidario Fundación CID no que se medirá ao Dominion Bilbao Basket o 25 de setembro e Valencia Basket ou ao Herbalife Gran Canaria o día 27.

O club compostelán confirmou este mesmo luns a súa participación neste torneo, onde se medirá ao equipo biscaíño o venres 25 a partir das 20:45 horas.

Trátase dun torneo solidario, xa que a recadación irá destinada a Cáritas e ao Banco de Alimentos, informa a entidade a través dun comunicado.

A xornada do sábado será a de descanso para os de Moncho Fernández, xa que se enfrontarán canarios e valencianos, que buscarán unha praza na final ou no terceiro e cuarto posto.

O domingo enfrontaranse os gañadores de ambos os encontros a partir das 19.30 horas mentres que a partir das 17.00 horas mediranse os dous perdedores das semifinais.

Os organizadores do torneo comezan este luns mesmo a venda de entradas cun prezo do bono para os catro partidos de vinte euros, mentres que as entradas de partidos soltos teñen un prezo de doce euros para adultos e seis para nenos.