Nolito: "A miña filla veu con mal cor de cara e todo, parece que estivo metida nunha cova"

"A miña filla veu con mal cor de cara e todo, parece que estivo metida nunha cova". Con estas palabras no programa El Transistor, de la Cope, Nolito deixou claro que quere deixar o Manchester City e Inglaterra.

"De inglés aprendín pouco, pouco... que complicado é! Só tomorrow, good morning, good afternoon e pouco máis", continuou o ex xogador do Celta, cuxo futuro se relaciona co Sevilla, onde previsiblemente adestrará Eduardo Berizzo a próxima tempada.

De feito, Nolito e o director deportivo do Sevilla, Óscar Arias, mantiveron este martes unha charla nunha xeadería próxima ao estadio Ramón Sánchez Pizjuán, en cuxos contiguos o internacional español tamén se fotografou con algúns afeccionados.

A fotografía que recolle a charla entre Arias e Nolito, que pasa un período das súas vacacións en Sanlúcar de Barrameda (Cádiz), a súa localidade natal, circulou de inmediato polas redes sociais, así como outras instantáneas do xogador andaluz xunto a admiradoras no barrio sevillano de Nervión.

Estas imaxes, reproducidas polas edicións dixitais de diversos xornais, dispararon as especulacións ante o posible interese do Sevilla polo sanluqueño e despois de que Nolito recoñecese recentemente que non vería mal saír a próxima tempada do City para ter máis minutos, sobre todo de cara ao Mundial de 2018.