O Celta de Vigo visita esta noite ao Manchester United no partido de volta das semifinais da Europa League coa obrigación de remontar o 0-1 da ida, o enésimo desafío do curso para o equipo que dirixe Berizzo, que confía na súa capacidade goleadora para dobregar ao máximo favorito ao título.
O Celta, que estará arroupado por máis de dous mil afeccionados en Old Trafforfd, apela ao "espírito de Vila Park", o estadio onde hai dezanove anos levantou o mesmo resultado a un Aston Vila (1-3) que por entón lideraba a Premier League.
Ese triunfo permanece aínda indeleble na memoria dos afeccionados celestes, do mesmo xeito que a xesta desta tempada en Jarkov, onde o seu equipo tamén logrou remontar o 0-1 que o Sakthar Donestk conseguira en Balaídos cun gol de Iago Aspas de penalti no tempo de desconto e outro de Cabral na prórroga.
Logo de facer historia ao clasificar ao Celta para as semifinais dunha competición europea, Berizzo e os seus futbolistas buscan completar un ano inesquecible co pase á gran final de Solna, algo impensable o pasado verán, tras a marcha de Nolito ao Manchester City e o mal arranque na Liga.
Pero este equipo supérase a si mesmo desde a chegada do adestrador arxentino ao seu banco. Con el como técnico, non só disputou dúas semifinais da Copa do Rei e derrubou o muro dos cuartos de final en Europa, senón que se consolidou cun estilo futbolístico que xa sufriron rivais da talla do Real Madrid, Atlético, Barcelona ou Shakthar.
Logo das rotacións masivas fronte ao Málaga, Berizzo retomará o seu once tipo das grandes citas, coa volta do tridente ofensivo formado por Pione Sisto, John Guidetti e Aspas, que actuará con máis liberdade para intentar así faxarse da intensa marcaxe á que foi sometida na ida.
Do seu acerto dependerá, e moito, alargar o soño europeo, así como de que o tridente Hernández, Radoja e Wass logre impor a súa calidade ao poderío físico do centro do campo do Manchester, que no primeiro partido gañou todos os duelos individuais, especialmente o francés Paul Pogbá.
Tampouco se esperan sorpresas na liña defensiva, pois Berizzo parece convencido de repetir con Roncaglia como compañeiro de Cabral no centro do eixo para contrarrestar a rapidez dos dianteiros ingleses. Hugo Mallo e Jonny son indiscutibles nos laterais, mentres que Sergio Álvarez, descomunal na ida, manterase na portería
Manchester, penúltima parada do Eurocelta?
A expedición celeste xa está en Inglaterra, onde esta noite necesita gañar para meterse na final da Europa League
