A selección masculina de rugby de Nova Zelandia, coñecida como os All Blacks, foi distinguida este mércores co Premio Princesa de Asturias dos Deportes 2017, un galardón ao que optaban vinte e catro candidaturas de once nacionalidades.
Os All Blacks, situados no primeiro lugar do ranking internacional do rugby, constitúen unha lenda no ámbito mundial e en Nova Zelandia, onde o rugby é o deporte nacional, e ademais están considerados como un exemplo de integración racial e cultural.
Na edición do pasado ano, este premio recaeu no triatleta Javier Gómez Noya, que se uniu así a unha nómina na que tamén están, entre outros, os irmáns e xogadores de baloncesto Pau e Marc Gasol, o Maratón de Nova York; José María Olazábal; Iker Casillas e Xavi Hernández; Haile Gebrselassie; a Selección Española de Fútbol; Yelena Isinbayeva; Rafa Nadal; Michael Schumacher ou a Selección Española de Baloncesto.
TRIUNFOS E DEPORTIVIDADE. A selección neozelandesa foi distinguida con esta Princesa de Asturias dos Deportes 2017 polos seus "extraordinarios éxitos deportivos" e tamén por "reflectir grandes valores como a solidariedade e a deportividade", segundo a acta do xurado.
O xurado, que deu a coñecer o fallo no mediodía deste mércores en Oviedo, enxalzou aos All Blacks como "icona" mundial do rugby.
A acta, que foi lido polo presidente do xurado, o exatleta Abel Antón, resaltou que a selección de Nova Zelandia é o combinado nacional máis laureado da historia do rugby, e que a súa altísima porcentaxe de vitorias sitúaa entre os equipos máis exitosos de calquera deporte.
"INTEGRACIÓN RACIAL E CULTURAL". Ademais, valorou que os All Blacks representen "un exemplo de integración racial e cultural, que contribuíu á unidade de neozelandeses de diferente orixe, simbolizado na haka -danza tribal maorí-, vínculo coas súas raíces e o seu patrimonio ancestral".
O Premio dos Deportes é o cuarto dos oito galardóns internacionais que convoca cada ano a Fundación Princesa de Asturias, e que cumpren con esta a súa XXXVII edición.
Ata agora foran distinguidos o polifacético creador surafricano William Kentridge, co das Artes; o grupo humorístico-musical arxentino Les Luthiers, co de Comunicación e Humanidades, e a Hispanic Society of America (HSA), co de Cooperación Internacional pola súa contribución á promoción da cultura e dos valores do hispano e o latino.
