Denuncian a Siareiros Lugo por insultos ao Xetafe e ao árbitro

A Liga denunciou insultos e cánticos ofensivos das afeccións do Leganés, o Lugo e o Córdoba durante a última xornada de Liga, a pesar das medidas de prevención da violencia adoptadas polos citados clubs previas aos encontros.

No caso do Lugo-Xetafe a denuncia é consecuencia da actitude dos seguidores do club galego, membros do grupo coñecido como Siareiros Lugo e entre os que se atopaban integrantes de Brigadas Lucenses, situados diante dunha pancarta coa inscrición Siareiros Lugo.

Estes afeccionados, que segundo a Liga eran uns cen, proferiron insultos cara a xogadores do equipo rival e cara ao árbitro en tres ocasións nos minutos finais do partido, insultos que non foron secundados polo resto da afección, que tivo un comportamento "absolutamente correcto durante todo o partido".

LEGANÉS-SEVILLA. No seu escrito, a Liga reflexa que no Leganés-Sevilla, co xogo parado tras unha falta cometida sobre un xogador local, desde distintas zonas do campo entoouse durante uns 15 segundos, de forma coral e coordinada, a expresión "puta Sevilla, puta Sevilla".

O cántico procedeu de diversos lugares do estadio de Butarque onde había seguidores locais, aínda que é difícil calcular o número destes, segundo sinalou a Liga, que destacou que no recinto figuran expostos carteis co Regulamento de prevención da violencia, o racismo, a xenofobia e a intolerancia no deporte.

Tamén o Leganés realizou rexistros e controis nos accesos ao seu campo e levou a cabo durante o encontro e nos días previos ao mesmas iniciativas para pedir respecto aos afeccionados.

CÓRDOBA-SEVILLA ATLÉTICO. A outra denuncia da Liga corresponde ao comportamento de medio centenar de afeccionados do Córdoba no partido contra o Sevilla Atlético, que nun momento no que había un xogador rival tendido sobre o campo gritaron "písao, písao" e a continuación dedicaron insultos ao conxunto rival.

A pesar disto, o Córdoba tamén expuxo nas súas portas de acceso o regulamento de prevención da violencia, o racismo, a xenofobia e a intolerancia no deporte e entre as medidas preventivas antes do encontro o director de seguridade inspeccionou os instrumentos de animación dos afeccionados locais -pancartas, megáfonos, bombos e bandeiras- que quedaron custodiados no estadio ata antes do comezo do partido