A Ertzaintza actúa de oficio contra o ultra do Betis que agrediu a un home en Bilbao

A Ertzaintza abriu un atestado de oficio contra os tres afeccionados do Betis implicados na agresión este xoves un home na Praza Nova de Bilbao e imputoulles un delito de trato degradante.

Aínda que a vítima non presentou denuncia polos feitos, a policía vasca, que identificou aos agresores, remitiu o atestado ao xuíz para que abra as dilixencias oportunas, segundo informaron fontes da Ertzaintza.

A agresión produciuse na terraza dun café da Praza Nova e posteriormente os seus autores publicaron nas redes sociais un vídeo do ataque. Na gravación, un mozo achégase a un home sentado na terraza, chámalle "Gabilondo" e pregúntalle se é "proetarra", mentres lle bota un vaso de bebida por encima e lle dá un tortazo, antes de que o agredido fuxa.

Posteriormente, unha patrulla da Policía autonómica vasca identificou e estivo co agresor e os seus dous acompañantes, e confirmou que todos eles eran afeccionados do Betis.

CONDENA. O Real Betis condenou "enerxicamente" a agresión e asegurou que "baixo ningún concepto representa á afección verdibranca". "Feitos como estes, contrarios aos valores que preconiza o fútbol e o Real Betis, deben erradicarse do noso deporte", subliñou o club verdibranco na súa conta oficial de Twitter.