sábado. 17.04.2021 |
El tiempo
sábado. 17.04.2021
El tiempo

A Audiencia Nacional xulgará a Bartomeu pola fichaxe de Neymar

El presidente del Barcelona, Josep María Bartomeu
El presidente del Barcelona, Josep María Bartomeu
A sala rexeita o seu recurso e recórdalle que tiña a mesma responsabilidade que Rosell, entón presidente, na fichaxe do xogador

O presidente do Barcelona, Josep Maria Bartomeu, sentará no banco por un delito de corrupción entre particulares despois de que a Audiencia Nacional confirmara o seu procesamento por irregularidades na fichaxe do dianteiro Neymar da Silva.

Nun auto, a sección cuarta da Sala do Penal rexeita o recurso da defensa de Bartomeu contra o seu procesamento, ao entender que si hai indicios de que cometese ese delito porque os acordos en 2011 entre o Barça e Neymar para fichalo desde o Santos alteraron "o libre mercado de fichaxes de futbolistas, ao impedir que o xogador entrase no mercado conforme ás regras da libre competencia".

A participación de Bartomeu nesta operación foi "nítida", di a sala, porque ostentaba nese momento a vicepresidencia do Barcelona e tiña "responsabilidades directivas no ámbito deportivo" ao mesmo nivel que o entón presidente, Sandro Rosell, "participando ambos" nos contratos supostamente fraudulentos de 2011 para negociar o traspaso, que se produciu finalmente en 2014.

Nin Bartomeu nin Rosell, tamén procesado, informaron destes acordos á xunta directiva do Barça, nin ao Santos nin ao fondo DIS, que é o impulsor da querela e resultou prexudicado pola operación porque tiña nese momento o 40 % dos dereitos federativos de Neymar e non recibiu o diñeiro que tiña que cobrar.

Nesta causa tamén están procesados o propio Neymar da Silva e o FC Barcelona como persoa xurídica, ademais da nai do xogador, Nadine Gonçalves, a empresa familiar N&N e o Santos.

A Audiencia Nacional recorda que a fichaxe se pactou con Neymar e coa empresa familiar N&N (que tiña ao 50% cos seus pais e ostentaba os dereitos económicos de Neymar) en dous contratos de novembro e decembro de 2011, que, baixo a simulación doutros conceptos, en realidade perseguían pechar o traspaso en 2014, cando Neymar xa tería a condición de "free agent" e non estaría suxeito aos dereitos de DIS.

Así, acordaron a fichaxe por 40 millóns de euros nun contrato e noutro un "préstamo" ficticio de 10 millóns máis a N&N, que en realidade, di o auto, respondía a "un pago parcial da transferencia do xogador". Por iso, a sala ratifica que hai indicios dun delito de corrupción entre particulares porque o Santos descoñecía o acordo, xa que nin Neymar nin o Barcelona llo comunicaron e a mercantil DIS "tampouco coñeceu o traspaso pactado".

O de Bartomeu era o último recurso por resolver dos procesados neste caso, polo que agora o xuíz poderá abrir xuízo oral. O xuíz instrutor do caso, José de la Mata, arquivouno en xullo de 2016 ao non ver delito, pero tívoo que reabrir por orde da Sala do Penal, tras o que a Fiscalía fixo a súa petición de penas: 2 anos de cárcere e 10 millóns de euros de multa para o xogador, 5 anos para o expresidente do Barça Sandro Rosell, 2 anos de cárcere para o pai de Neymar e un ano para a súa nai.


O fiscal da Audiencia Nacional José Perals pediu no seu escrito de acusación o arquivo da causa para o presidente do Barcelona, Josep María Bartomeu, aínda que DIS pídelle 5 anos de cárcere.

A Audiencia Nacional xulgará a Bartomeu pola fichaxe de Neymar
comentarios