Kepa Arrizabalaga deixará o Athletic de Bilbao rumbo ao Chelsea previo pago da cláusula de rescisión de 80 millóns de euros, superando así os 72 que pagou o Liverpool ao Roma polo brasileiro Alisson Becker, co que se converterá no porteiro máis caro da historia.
O novo gardameta do equipo de Klopp desbancou do primeiro posto da clasificación a un Gianluigi Buffon que lideraba esta táboa desde o ano 2001, no que o Juventus pagou 52 millóns ao Parma por facerse cos seus servizos.
Kepa supera tamén, obviamente, a David de Gea como o gardameta español polo que se desembolsou unha maior cantidade de diñeiro. O Manchester United pagou 25 millóns de euros ao Atlético de Madrid polo porteiro madrileño hai sete anos, segundo datos de Transfermarkt.
O gardameta de Ondároa (Biscaia) sitúase provisionalmente na terceira posición dos traspasos máis caros durante este mercado de verán, por detrás dos 135 millóns que pagou o París Saint-Germain ao Mónaco por Kylian Mbappé —facendo efectiva a súa opción de compra obrigatoria tras un ano de cesión— e da marcha de Cristiano Ronaldo á Juventus de Turín procedente do Real Madrid previo pago de 117 millóns de euros.
COURTOIS. O gardameta belga, Thibaut Courtois, non se deixou ver no campo de adestramento este martes, por segundo día consecutivo, co Chelsea.
Courtois, de 26 anos, tiña permiso do club para incorporarse máis tarde aos adestramentos logo da súa participación na Copa do Mundo de Rusia 2018, pero, a diferenza do seu compatriota Eden Hazard, que se presentou o luns na cidade deportiva de Cobham, o porteiro segue en paradoiro descoñecido.
O belga, ao que queda un ano de contrato co conxunto do suroeste de Londres, busca recalar no Real Madrid, chamando a atención de Florentino Pérez, e regresar á capital española —xogou nas filas do Atlético—, onde viven os seus dous fillos.
Os dez porteiros máis caros da historia (TOP 10):
